Astelehen arratsaldean gizonezko bat atxilotu zuen Ertzaintzak Hernanin, ustez neskalagun ohia sexualki erasotzeagatik. Ertzaintzak azaldu duenez, gertaera gizonezkoaren etxean izan zen: «bikote ohia gizonezkoaren etxera joan zen bisitan eta ustez, tarte horretan, gizonezkoak sexualki erasotu zuen emakumea, indarra erabilita. Emakumea Ertzain etxera gerturatu zen handik ateratzean, gertatutakoa salatzera. Ondoren Donostiako Ospitalera eraman zuten, forenseek aztertu zezaten».
Ertzaintzak ustezko erasotzailea atxilotu zuen segidan, sexu erasoa eta genero indarkeria leporatuta. Herenegun utzi zuten epailearen esku eta honek espetxeratzeko agindua eman zuen.