Sinatu egingo dute lankidetza hitzarmena, Astigarragako Udalak eta San Marko Mankomunitateak, hondakinen bilketa sistemaren inguruan. Hala erabaki zuen plenoak, larunbatean, EAJ eta PSE-EEren aldeko botoekin. EH Bilduk kontra bozkatu zuen: «onartu egingo dugu edukiontzi bidezko sistema ezartzea, herriaren erabakia delako. Baina gauzak egiteko modua ez zaigu egokia iruditzen», kexatu zen Andoni Gartzia, EH Bilduren bozeramailea.
Aho batez onartu zena izan zen, Txalaka-Oialumeko lehenengo partzelako Xehetasun Azterlana. Eta galderen puntuan, Gartziak eskatu zuen plenoen maiztasuna hilabetean behin izatera aldatzea, «ezohiko gehiago egiten direlako ohikoak baino»; eta kritikatu zuen, azkenean Mugikortasun Astean ekintzarik ez antolatu izana.
Kronikak larunbateko edizioan argitaratuko du, plenoari buruzko informazio zabalagoa eta osatuagoa.