Euskeraren Egunaren bueltan, astebeteko egitasmoa jarri du martxan Astigarragako Herri Eskolako Guraso Elkarteak: 100 ta 100... 200 ordu euskaraz. Asmoa da, hain justu, astebetez euskera hutsez bizitzea, bakoitzak bere esperientzia pertsonala izatea. Aste hori, azaroaren 26tik abenduaren 3ra bitartekoa izango da.
Horrekin lortu nahi dute, «Astigarragako euskaldunek esperientzia pertsonal bat bizitzea, konturatzeko uste baino egoera gehiagotan erabili daitekeela euskera; eta Astigarragan euskeraren erabilera haunditzea», azaldu dute.
Parte hartzeko, bi modu
Hiztunak izango dira protagonista, baina bi partaidetza mota bereiziko dituzte: euskeraz biziko direnak edo hiztunak (aho baten irudia eramango dute txapa batean); eta hizkideak, hiztunei euskeraz bizitzen lagunduko dietenak, hizkuntzaz aldatzeko ez eskatuz, euskeraz egiteko eskatuz nahiz eta berak erderaz egin... (belarri baten irudia eramango dute txapan).
Urriaren 28ra arte daukate izena emateko aukera astigarraganeuskaraz@gmail.com emailera idatzi, edo fitxa bete antolatzaileen egoitzetan. Bertan zehaztu behar da, hiztun edo hizkide izango den.
Tailerra, azaroaren 12an
Eta zehaztu beharko da, baita ere, azaroaren 12ko tailerrean parte hartu nahi den. Euskeraz bizitzeko estrategiak lantzeko tailerra izango da, 09:30etatik 13:30etara, hiztunentzat. Gero, argazki erraldoi bat egingo dute prentsaurrean, egitasmoa azalduz eta herritarrak parte hartzera gonbidatuz.
Azaroaren 26an, ekitaldi batekin emango diote hasiera egitasmoari. Eta abenduaren 3an emango zaio bukaera euskera hutsez bizitzeko asteari, herritarren esperientziak biltzeko tartea eginez.