Hernanik behin baino gehiagotan erakutsi du herri solidarioa dela. Odol emaileen kasuan esaterako, dozenaka dira, hilero-hilero, odola ematera gerturatzen direnak. Eta horien artean, izaten dira emaile berriak, askotan pentsatu eta azkenean pausua ematera animatzen diren horiek. Odol emaileen elkartetik dagoen beharra azpimarratu nahi izan dute behin eta berriz. Hilabeteko aurreneko asteartean izaten da odola emateko aukera Hernanin, betiko ordutegian: 18:30etatik 20:30era. Organo donante egiteko aukera ere izaten da. Odola eman ostean, emaileek jatekoa eta edatekoa izaten dute aukeran; elkartetik eskerrak eman nahi dizkiete bereziki Vinicola Guipuzcoanari, ardoa emateagatik.
Intsinia eta diplomen banaketa, urriaren 23an
Bestalde, Gipuzkoako Odol Emaileen elkarteak eskerrak eman nahi izaten dizkie odola behin baino gehiagotan ematen dutenei; zehazki, 25, 40, 50 edo 75 donazio baino gehiago egin dituztenei. Urtero bazkaria antolatzen dute, eta bertan banatzen dituzte intsinia eta diplomak; aurten 20 hernaniarrek jasoko dute merezitako errekonozimendua. Hitzordua urriaren 23an jarri dute Urnietako Oianume sagardotegian, eguerdiko 13:15etan hasita.