Jakina da euskaldunok eguraldiaren berri izateko dugun zaletasuna. Urtaro aldaketa dela, tenporak direla... Irailaren 22an hasi zen udazkena, eta iragarri dutenez, «normala» izango da: hegohaizea eta eguraldi barea aurreneko asteetan, eta euri eta freskotasun gehiago abendua gerturatu ahala.
«Udazkena, udazkena izango da»
Tenporek oinarri zientifikorik ez badute ere, asko dira iragarpen metodo honetan fedea dutenak. Udazkena iragarri zuten tenporak joan den astean izan ziren, irailaren 21ean, 23an eta 24an hain zuzen; eta egun horietako bakoitzak iragartzen du, udazkeneko hilabete bakoitzean zein eguraldi egingo duen.
Pello Zabala da tenporei erreparatzen dien horietako bat, eta joan den larunbatean honen inguruan aritu zen Euskadi Irratiko Landaberri saioan. Bukatu berri den udararen errepasoa egin zuen Zabalak bertan: «lau hilabeteak oso lehorrak izan dira, ur eskasekoak. Eskerrak negu erditik udaberrira 900 litro bota zituen!». Udako azken astean nabarmena izan da tenperaturaren beherakada, eta euria eta trumoia ere izan da han eta hemen. Zabalaren esanetan ordea, tenporak hasi ziren egunean, asteazkenean, onera egin zuen nabarmen: «golpetik bukatu egin ziren zortzi egun horiek, justu tenporen egunean». Asteazkenean eguraldi sanoa egin zuen, tenperaturak 20 graduak gainditu zituen ordu epelenetan, eta eguzkia izan zen nagusi. Ostiralean lainoak ugaritu egin ziren, eta haizean ere aldaketa etorri zen, iparraldetik sartu baitzen. Eta larunbatean eguraldi bikaina izan zen, eguzkitsua eta beroa. Zabalaren esanetan egun horiei erreparatuz gero ikusi daiteke udazkena nola joango den: «udazkena izango da gozoa, naturala, hemen izaten den bezalakoa». Urrian hego haizea espero da, eta eguzkiak ere lagunduko du, lehorxeagoa izango da. Azarotik aurrera, ostiraleko fronte txiki hori nabarituko da, eta hil honetan gertatu ohi bezala, egun euritsuak izango dira. Abendura bidean, negua iritsi ahala, tenperaturek behera egingo dute, nahiz eta eguzkiak lekua izango duen.
Euskalmet eta Aemeten iragarpenek ere, «udazken normala»
Euskalmetek ere egin du udazkenaren iragarpena: «iragarpen guztiek diote parametro normaleko udazkena izango dela. Tarteka fronteak iritsiko dira, eta azaroan nabarmen feskatuko du. Haizeak hego ekialdetik eta ipar ekialdetik joko du».
Aemetek dio udazkenak bi aurpegi izango dituela: «Santu Guztien Eguna bitartean giro lehorra izango da, eta handik aurrera euritsua. Urrian hegotik joko du haizeak, eta azaroa euritsua izatea espero da». Tenperaturari dagokionean 15-16 graduen bueltan ibiliko dela azaldu dute Ametetik.