Herritarrei eskerrak emanez hasi du hauteskunde emaitzen balorazioa EH Bilduk, prentsa ohar bidez: «eskerrak Hernaniko herritarrei, guregan jarri duzuen konfiantzagatik. Zuen 3.977 irriek Hernaniko lehen indar politikoa egiten gaituzte, alde haundiarekin, eta gure konpromisoa da, zuekin batera, prozesu independentista martxan jartzea eta Euskal Herri justuagoa eta bidezkoagoa lortzea». Era berean, eskerrak eman ditu «EH Bilduren mezua zabaltzeko lana egin duten herritar guztiei».
«Ekainetik honuntza, 1.100 boto irabazi ditugu Hernanin»
Hain zuzen, «igandeko emaitzak denon lanari esker lortu» dituztela azaldu du, eta hobekuntza nabaritu dela.
«Azpimarratu nahi dugu EH Bilduk berreskuratu duen gorako joera. Ekainetik honuntza 1.100 boto irabazi ditugu Hernanin, eta ehunekotan 13 puntu igo ditugu botoen %43 pasata. Hiru hilabete eskasetan ezker soberanistaren proiektu politikoa berrindartzea lortu dugu, eta nola gainera!». Era berean, emaitza orokorren balorazio positiboa egin du: «Erkidegora begira ere, guztira 70.000 boto berreskuratu ditugu, eta bigarren indar politikoa gara, alde haundiarekin».
Kezka, baina ilusioa
Bestalde, «PNVren garaipena haundia eta oso zabala» izan dela azaldu du EH Bilduk, eta «gorakada kezkarekin» ikusten dute, «eskubiaren eta autonomismo hutsalaren garaipena suposatu dezakeelako».
Baina horren aurrean, «erabakitzeko eskubidearen alde, eredu sozial berri baten alde eta benetako bake justuago baten alde indarrak biltzen» saiatuko direla dio. «Igandeko argazkiak erakutsi du ezker independentista indartsu dagoela, ilusioa duela, proiektu eta ekipo ezinhobea dituela, beraz, denok lanera. Dena dugu irabazteko eta Euskal Herria libre, independiente, eta justoa lortuko dugu. Hemen eta orain, posiblea da».