Orain arte Hernaniko Gazte Txokoa eraldaketa prozesu batean murgildu zen lehengo urtean, eta bihartik aurrera hasiko da horren emaitzetako bat nabaritzen: bihar, arratsaldeko 18:00etatik 21:00etara Gaztelekuaren (Aristizabal 5, behea) irekiera festa egingo da; aurrerantzean, izen hori izango baitu.
Hernaniko Udalak herriko nerabeei zuzentzen dien zerbitzu publiko eta doanekoa da Gaztelekua, 13-17 urte bitarteko herritarrei zuzendutakoa, gaur egun, azken urteotan bezala, Urburu Aisialdi Elkarteak kudeatzen duena, lehiaketa irabazi ondoren.
Udalak Haur eta Gazteria Arloa garatzeko baliabideak indartu zituenean hasi zen eraldaketa. Gazteen beharrak eta nahiak ezagutzeko lanean aritu dira Garazi Etxarri gazteria zinegotzia, Udal teknikariak eta Gaztelekuko hezitzaileak, eta hausnarketa sakona egin dute 2015-2016 ikasturtean. Ondorioz, hainbat aldaketa egin dituzte, eta horietako bat izan da, lokala bera berritzea: «oraindik ez dago bukatua, baina dagoeneko espazio gehiago eta baliabide gehiago lortu ditugu, eta nerabeekin batera, denen artean aldaketa prozesua bultzatzea espero dugu».
Nerabeak, protagonista
Eraldaketa prozesu honen ondorioz, hainbat gauza aldatuko dira Gaztelekuan, eta horietako bat izango da erabiltzaileen adin tartea. DBHko ikasleei, 13-17 urte bitartekoei, protagonismoa eman nahi dietela azaldu dute Eunate Belegain eta Xabi Ormazabal hezitzaileek.
«Gazte Txokoa bihurtu zen ludoteka moduko bat, gaztetxoentzat. Ondorioz, 6garren mailako asko etortzen ziren, eta nerabeak gutxi. Baina orain Gaztelekua izango da; nerabeei protagonismoa emango diegu».
Ondorioz, seigarren mailako gaztetxoen ordutegia mugatu egin dute 2016-2017 ikasturterako: asteartetik ostegunera, 17:00etatik 18:30etara. Nerabeek, aldiz, zerbitzua zabalik dagoen ordu guztietan parte hartu dezakete.
Kezkak eta beharrak asetu; eta parte-hartzea bultzatu
Era berean, Gaztelekua erabiltzeko modua ere aldatu egingo da: «hilero prestatzen genuen egitaraua kendu eta gazteen parte-hartzea sustatuko dugu. Beraiek antolatu, eta guk lagundu egingo diegu».
Izan ere, Gaztelekua ez da lokal soila: «helburua ez da etorri eta egotea. Hau ez da lokala, proiektu hezitzailea da. Gazteen kezka eta beharrei erantzuteko erreferentzia puntua izan nahi dugu. Ez gara guraso edo irakasle, baina bai gertuko helduak, bidelagunak, gurekin elkarbanatu nahi dutenari erantzuten laguntzeko».
Era berean, lokaletik ateratzeko ahalegina ere egingo dutela azpimarratu dute: «nerabeak dauden tokira joango gara. Haien interesetan zentratu, eta nahi duten hori antolatzen lagundu, bulegoan informazioa bilatuz, egin nahi duten ekintza edo irteera antolatzen lagunduz...».
Bestalde, gazteekin elkartu nahi duten herriko beste eragileekin bildu eta koordinazio lanetan aritzeko puntua ere izango da.
Gaztetu Hernanirekin bat
Hau guztia, lotuta dago 2014an Udalak martxan jarritako prozesuarekin. Gaztetu Hernani prozesuaren ondorioz, gazte kontseilua osatu zen, Udalak eta herriko gazteek osatzen dutena. Aldiro biltzen dira, elkarrekin hausnartzeko eta gazteen intereseko proiektu berritzaileak diseinatzeko.