Abuztuan atera ziren Burgoseko Quintanar de la Sierra herritik lau gurdiak, bakoitza bina idi eta behi menditarrek tirata. 18 etapatan, Pasaiako Albaola Itsas Kultur Faktoriara iristea dute helburu, bertan, garai hartako teknikak erabiliz eraikitzen ari diren XVI. mendeko baleontzirako alkitrana eta bikea eramateko.
Atzo, 10:20 aldean iritsi ziren Hernanira, Portu auzora, Urnietatik, eta hainbat herritar bildu ziren ikusmiran; baita Urumea ikastolako ikasleak ere. Astigarragara egin zuen gero, eta Ergobian harrera egin zien Zorione Etxezarraga alkateordeak. Lizeaga sagardotegian bukatu zuten atzoko etapa, eta gaur iritsiko dira Pasaiara, Donostia osoa zeharkatu ondoren.