EH Bildu izan zen atzo, berriro ere, indar bozkatuena Hernanin, Eusko Legebiltzarrerako hauteskundeetan. Orain lau urtekoekin alderatuz, hala ere, behera egin du pixka bat: botoen %43,37 lortu zituen atzo, eta 2012an %47,29. Bigarren alderdi bozkatuena EAJ izan da, duela lau urte bezala, botoen %24,32arekin (2012koetan %23,21a lortu zuen).
Elkarrekin Podemos ez da Espainiakoetan bezain indartsu sartu, baina hala ere, 1.458 boto lortu ditu Hernanin (guztien %15,9), hirugarren alderdi bozkatuena izateko.
PSE-EEk, bere aldetik, nabarmen egin du behera Hernanin, eta 2012an 1.490 boto jasotzetik (%15,7), atzo 863 lortzera pasa zen (%9,41). Eta PPk, 394 boto jaso zituen (%4,29), 2012koen antzeko.
Ciudadanosek 98 boto lortu zituen (%1,06); PACMA/ATTKAA koalizioak 55 boto (%0,59); Ganemos: Si Se Puedek 48 boto (%0,52); Recortes Cero-GVk 20 boto (%0,21); Libertate Nafarrak 14 boto (%0,15); eta PFyV taldeak 12 boto (%0,13). Hortaz, aukeran zeuden alderdi guztiek jaso dituzte botoak.
Abstentzioak gora Hernanin, %60,54ko partehartzearekin
15.332 herritar zeuden deituta atzo, botoa ematera, eta horietako %60,54a hurbildu zen hautestontzietara. Horrela, beraz, gora egin zuen abstentzioak, duela lau urteko hauteskundeen aldean: %39,46koa izan zen atzo, eta %37,18a abstenitu zen 2012an.
EAJ nagusiago, Eusko Legebiltzarrean
EH Bilduren beherakada, nabarmenagoa izan zen maila orokorrean. Legebiltzarrean 21 eserleku izatetik, 17 izatera pasako da. Eta EAJk jarraituko du indar nagusia izaten Gasteizko parlamentuan; beste pixka bat gora eginda, gainera: 29 legebiltzarkide izango ditu, orain arte baino bi gehiago.
Elkarrekin Podemos 11rekin sartuko da Legebiltzarrean, hirugarren alderdi bozkatuena izanda. PSE-EEk 9 izango ditu, aurreko lau urteetan baino bat gutxiago. Eta PPk osatuko du parlamentua, 9 eserlekurekin (bat galdu du).