Zazpi talde osatu ditu aurten Hernaniko Saskibaloi Elkarteak, eta lorpenarekin pozik agertu dira arduradunak. Horietako bi, gainera, infantilen mailakoak dira; harrobia zaintzea garrantzitsua baita.
Hain zuzen, Urko Vitoria entrenatzaileak azaldutakoaren arabera, harrobiko jokalariek indartu dute aurten mutilen seniorren taldea, eta gaur bertan hasiko dute denboraldia, iluntzeko 20:00etan Aieteko kiroldegian, Atletico San Sebastianen kontra.
Talde gaztea, aurtengoa
Taldean aldaketa ugari izan direla aitortu du Vitoriak, eta horrek, alde onak eta txarrak izango ditu.
«Pasa den urteko 12 jokalarietatik seik bakarrik jarraituko dute jokatzen, eta harrobitik zazpi jokalari gehitu ditugu. Beraz, aurten taldeko hamahiru jokalariak harrobikoak dira». Hori garrantzitsua da elkartearentzat, baina aurtengo denboraldirako ahulgunea ere bada. «Taldeko sei jokalarik aurten jokatuko dute aurrenekoz kategoria honetan, eta beste bizpahiruk 20 urte besterik ez dauzkate. Eskarmentu falta ahulgune garrantzitsua izan daiteke hainbat partidutan».
«Iazko garaipen kopurua haunditzea da helburua»
Baina aukerarik ere ez dute falta. «Gure indargune nagusia abiadura, fisikoa, intentsitatea eta defentsa dira. Gure mutilek borroka egingo dute partidu guztietan; ziur nago». Gainera, ligan bertan aldaketan izan dira. «Lehiarako sistema aldatu egin da eta horrek, seguru asko, liga askoz parekatuagoa izatea eragingo du». Hori horrela, helburu garbia dauka Vitoriak, taldearentzako: «Helburua aurreneko zortzi taldeen artean egotea izango da; iazko garaipen kopurua hobetzea. Ziur gaude lortuko dugula».
Hala ere, badaki ez dutela areriorik faltako. «Lehenengo zortzien artean egotea ikaragarrizko arrakasta izango litzateke. Aurten hainbat taldetan aldaketa ugari egon dira. Hala ere, Donostiako Bosteko, Alde Zaharra edo DKS, eta Astigarraga eta Azpeitia izango dira, nere ustez, aurtengo talde gogorrenak». Borroka eta emoziorik ez da faltako, beraz.
«Aurten nesken beste talde bat ateratzea lortu dugu, infantiletan; guretzat oso garrantzitsua da Hernaniko neskei kirola egiteko aukera ematea»
«Neska guztiak oso lehiakorrak dira»
Era berean, borrokarako prest dago nesken taldea ere. Iaz, kadeteetatik jubeniletara igo ziren, eta aurten, «denboraldi polita» espero du Vitoriak. «Nahiz eta taldea txikia den, neska guztiak oso lehiakorrak dira, eta ez dute adina oztopo izango. Hori, kategoria hauetan asko nabaritzen da».
Bestalde, nesketan ere harrobia lantzeko aukera izango dutela nabarmendu du. «Aurten nesken beste talde bat ateratzea lortu dugu, infantiletan. Guretzat oso garrantzitsua da Hernaniko neskei kirola egiteko aukera ematea».
Saskibaloi eskola, etorkizunerako giltza
Baina nesken kasuan bakarrik ez; infantiletan, mutilen talde berria osatzea ere lortu du elkarteak, eta orokorrean, jokalari berri gehiago izango dira denera. «Talde guztietan jokalari berriak egotea lortu dugu aurten. Hernani Saskibaloi Elkartearentzat oso garrantzitsua da zazpi talde osatzeko aukera izatea, eta infantiletan bi lortzea (neskak eta mutilak), entrenatzaile gutzientzat saria da».
«Elkartearentzat oso garrantzitsua da zazpi talde osatzeko aukera izatea, eta infantiletan bi lortzea, entrenatzaile guztientzat saria da»
Horrekin lotuta, saskibaloi eskolari garrantzia haundia ematen dio elkarteak, hain zuzen, etorkizunean taldeak indartzeko garrantzitsua izango delako. «Erronka nagusia da jokalari talde nabarmena osatzea. Beraien artean jolastea, saskibaloia ezagutzea... nahi dugu, eta eskola bezala, partidu batzuk jolasten saiatuko gara. Hori lortzeko, saskibaloi federazioarekin elkarlanean arituko gara».
Gainera, jokalari berriak lortzeko eta jokalari beteranoei aukera berriak emateko, deialdi irekia egin du elkarteak udaran, eta arrakasta izan duela azaldu du Vitoriak. «Kiroldegiak eman zigun aukera oso positiboa izan da. Infantiletako bi taldeak osatzeko aukera izan dugu deialdi horri esker. Horrez gain, junior eta senior mailan aritzen diren jokalariei entrenatzaile lanetan aritzeko aukera eman diegu, horrela ere hazi daitezen». Etorkizunerako hari-mutur guztiak ondo lotuta dauzka klubak!