Ostegunera arteko epea dago izena emateko, Udalak 2016-2017 ikasturterako antolatu dituen bi ikastaroetan: biodantzan eta dekorazio margogintzan.
Biodantza, ume eta helduek
Bizipoza, kontzientzia eta osasuna landuko dira biodantza ikastaroan, musikaren ozeanoan murgilduta.
Hiru talde osatuko dira, adinaren arabera: helduena, astean bi orduko saioa, 283,50 eurotan; 3-7 urte bitarteko umeena, astean ordu beteko saioa, 141,75 eurotan; eta 8-11 urte bitarteko umeena, astean ordu beteko saioa, 141,75 eurotan.
Ikastaroa urrian hasi eta ekainera arte luzatuko da, eta talde bakoitzean izena ematen duten ikasleekin zehaztuko da saioen egun eta ordutegia. Gutxienez, 8 lagun beharko dira taldea ateratzeko, eta prezioa aldatu egin liteke; gero eta lagun gehiago, orduan eta merkeagoa izanen da ikastaroaren prezioa.
Dekorazio margogintza, apirilera arte
Beste ikastaroa, dekorazio margogintza, urritik apirilera bitartean emanen da, ostiraletan, 16:30etatik 19:00etara. Hemen ere, gutxienez 8 lagun beharko dira taldea osatzeko, eta kasu horretan, prezioa 250 eurokoa izanen da.
Teknika desberdinak landuko dira ikastaroan: altzariak berritu, koadroak margotu, egurra landu eta apaindu...
Izenematea, ostegunera arte
Udaletxera jo behar da izena emateko, ostegunera arte, 09:00etatik 12:30etara. Ordainketetarako kontu korrontearen zenbakia aurezktu beharko da.