Antzinako ohiturak berreskuratu eta iaz antolatu zuten aurrenekoz Euskal Herriko Sagardo Txapelketa Herrikoia Gipuzkoako Sagardogileen Elkarteak, Eusko Jaurlaritzarekin eta Hazi Fundazioarekin elkarlanean. Erantzuna ezin hobea zela ikusita, txapelketaren bigarren edizioa antolatu dute aurten. Gaur izango da finala Andoaingo Zumea plazan iluntzeko 20:00etan hasita.
Hernaniko eta Astigarragako 15 sagardotegi, aurten
Guztira Euskal Herriko 36 sagardotegik hartuko dute parte aurtengo edizioan, iaz baino lau sagardotegi gehiagok, eta tartean izango dira Hernani eta Astigarragako 15 sagardogile: Akarregi, Alberro, Iparragirre, Itxasburu, Larre Gain, Otsua Enea, eta Rufino, Hernanitik; eta Astarbe, Bereziartua, Irigoien, Larrarte, Lizeaga, Oiarbide, Petritegi eta Rezola, Astigarragatik.
Hainbat finalaurreko jokatu dira, aurretik, eta gaur puntuazio altuena duten 12 sagardotegik lehiatuko dute. Eta horien artean erabakiko da irabazlea.
Iazko aurreneko edizioan, Astigarragako Petritegi sagardotegiak jantzi zuen txapela; garaipena errepikatuko al du?
Herritarrak epaimahaikide bereziak
Gipuzkoako Sagardogileen Elkarteak azaldu duenez, edonor izan daiteke epaimahaikide, sagardoa gustatzea da baldintza bakarra: «orain arte, ohituta egon gara herri askotan egiten diren Sagardo Egun eta txapelketekin, baina txapelketa herrikoia desberdina da». Hortaz, Sagardo Lehiaketara joaten den herritarrak egin behar duen gauza bakarra zera da: «ateratzen dituzten sagardo desberdinak dastatu eta nork bere gustu eta iritziaren arabera nahi duen puntuazioa eman, batetik hamarrera». Elkarteak onartzen du ez dela txapelketa ofiziala, baina dioenez, «aukera ematen du herritar askoren iritzia jakiteko».
Txartelak salgai Andoainen, gaur arte
Gaur iluntzeko finalera joateko, txartelak salgai daude gaur arte Ontza Elkartean, Ondarreta tabernan eta Txuri Beltz tabernan, 30 euroan.
Diru horren truke, sagardoaz gain, euskal produktuetan oinarritutako menua dastatuko dute Lehiaketaren muina izango diren 200 bat herritarrek: Basatxerri urdaiazpiko, txorizo eta patea, ajoarrieroa Euskaber arrautzarekin, Eusko Labeldun hanburgesa, Basatxerri xolomoburu errea pikilo piperrekin, eta Idiazabal gazta.