Podiumeko kajoi altuenetik itxi du Ander Amonarriz hernaniarrak, jubenil mailako zikloa. Mendatan (Bizkaia) izan zuen denboraldiko azkeneko lasterketa: «berez, aurreko asteburuan bukatu behar nuen, baina maila ona eman arren, emaitzak ez ziren hain onak izan, eta amorrazio pixka bat neukan. Horregatik joan nintzen Mendatara, eta irabazita, gustorago bukatu dut denboraldia», dio Amonarrizek.
Txirrindulariak berak, urte honen balorazio ona egiten du: «maila ona eman dut, batez ere ekainetik aurrera, eta emaitzak ere onak izan dira. Hala ere, izan zitezkeen hobeak».
Afizionatuen mailara «salto haundia», AMPOrekin
Orain, jubenil maila utzi eta afizionatuetara pasa beharko du hernaniarrak: «salto haundia izango da, baina disfrutatzea espero dut», dio gogotsu. AMPO taldearekin ariko da kategoria berrian, bere oraingo taldea, Andoaingo, ez baita lehiatzen afizionatuetan. Ez du guztiz berria izango talde goierritarra, hala ere. Jubeniletan, lasterketaren bat egin izan du haiekin, Iruñerriko Itzulia adibidez; 27garren izan zen, eta taldeko onena.
Txirrindularitza, ikasketekin bateratuko du hernaniarrak, goi mailako ziklo bat ikasten ari baita: «mekanizatua ikasten ari naiz, eta pentsatzen dut, ez dudala inongo arazorik izango biak batera egiteko».