Gaur hasiko da Mugikortasun Astea Hernanin, eta hasiera emateko, beste behin, ginkana egokitua antolatu dute Koxka elkartea, Kemen, Hernades, Agi eta AGAEBek.
Atsegindegin izango da, arratsaldeko 17:30etan hasita, eta 19:30etara arte egongo dira bertan. Batetik, proba ezberdinak egingo dituzte, bakoitza desgaitasun batekin lotuta. Helburua da, desgaitasunen bat duenaren tokian jartzea: «haiek egunero sufritu behar izaten dituzten zailtasunen berri ikastea nahi dugu, baina modu dibertigarrian», azaldu du Koxka elkarteak. Gainera, proba bakoitzean puntuatuko dute parte hartzaileen gogoa, sinpatia...
Aurpegiak margotu, txapak, pinturak, txokolatea...
Eta bestetik, tailerrak ere jarriko dituzte. Aurpegiak margotzen arituko dira FEDER elkarteko kideak, txapa eta pintura tailerrak izango dira, eta txokolatea ere emango dute.
Koxka elkarteak gonbitea luzatu die herritar guztiei, bertaratu eta parte hartzeko, «ikusle bezala besterik ez bada ere», animatu dituzte.