Hastear dago Hernaniko Emakumeen Etxea definitzeko prozesua, eta horretarako, jardunaldiak antolatu dituzte larunbat honetan, Biterin. Goizeko 09:30etan hasiko dira, eta bertan izango da aukera, ezagutzeko Emakumeen Etxeak zer diren, nola funtzionatzen duten, beste herrietako esperientziak... Hitzaldia eskainiko du Mari Luz Esteban antropologoak; Arrasate, Ermua eta Basauriko esperientziak ezagutzera emango dituzte; Virjinia Imazen Klownklusioez gozatzeko aukera izango da; eta Komanditario berriak proiektua eta Andrekale ikusentzunezkoa aurkeztuko dituzte iluntzean.
Celia Okon ostiralean Leokan, Jabetze Eskolekin hasteko
Bestalde, ostiral honetan izango da Celia Okonen kontzertua, Leokako labaderoan, gaueko 22:00etan. Jabetze Eskolen ikasturte hasierako emanaldia izango da, hain justu aurreko astean bertan behera geratu zena, eguraldi txarra egin zuelako. Hainbat musika estiloren arteko fusioa eskainiko du, jatorri afroportugaldarreko musikariak.