Ergobiako eremuko Aiotzategi kaleko 4garren portalean, alokairu sozialeko erregimenean, babes ofizialeko 7 etxebizitza zozketatuko ditu Astigarragako Udalak.
Uztailaren 16ko Plenoan onartu ziren zozketarako baldintzak, eta uztailaren 21eko Gipuzkoako Aldizkari Ofizialean argitaratu ziren. Astigarragako udaletxearen webgunean ere irakurri daitezke: www.astigarraga.eus.
Izenematea zabalik, irailaren 19ra bitartean
Zazpi etxebizitza horien zozketan parte hartzeko izenematea irekita dago, eta irailaren 19ra arte izango da eskabideak aurkezteko aukera, Astigarragako udaletxean.
Eskaera egiteko aurkeztu behar dira, besteak beste, eskabide orria, familia liburua, NANaren fotokopiak, edota errolda ziurtagiriak. Bete beharreko baldintzen artean, berriz, nahitaezkoa da eskatzailea adin nagusikoa izatea, urtean gutxienez 3.000 euro eta gehienez 21.000 euro arteko diru-sarrerak edukitzea, eta Astigarragan erroldatua egotea edo egon izana ziurtatzea, edo bertan lan egitea.
Zozketa non eta noiz egingo den, aurrerago zehaztuko dute.
Garaje eta trastelekuekin
Zozketatuko diren zazpi etxebizitzetako bat egokitua dago ezintasunen bat duten pertsonentzako, eta denek dauzkate garajeak eta trastelekua.