Urtero bezala kaleratu ditu Udalak OHZ edo IBI zerga, eta hondakin-bilketa eta ur- hornidura eta saneamenduko tasak ordaintzeko dirulaguntzak. Urriaren 31ra arte egin daitezke eskaerak, hain zuzen, 2015eko IBI zergagatik, eta 2016ko tasengatik eskatu ahal izango dira laguntza horiek.
Laguntza desberdinak
Udala duela bi hamarkada baino gehiago hasi zen dirulaguntza hauek ematen eta helburua da diru-sarrera urriak dituzten familiak laguntzea. Horretarako, laguntza ezberdinak ematen dituzte, diru-sarrera horien arabera: OHZ edo IBIaren kasuan %50 edo %25eko deskontua; eta tasen kasuan, %100 edo %50ekoa.
Hainbat baldintza
Laguntzak jasotzeko, hainbat baldintza bete behar dira, besteak beste, diru-sarrera kopurua; ur kontsumoa 45m3 pertsonako/urtean baino gutxiago izatea; etxebizitzaren katastroko balioa 153.000 euro baino gutxiagokoa; ibilgailu bakarra izatea; eta Hernanin erroldatua egotea gutxienez urtebetez, eta Udalarekin zorrik ez izatea.
Baldintza horiek betetzen dituztenek, Hernaniko Harrera Zerbitzuan (HHZ) egin dezakete eskaera urriaren 31ra arte.