Euskal kultura eta tradizioa kanpinera ekarriz itxiko du, beste urte batez, bere denboraldia Iskibik. Euskal Jaia ospatuko dute bihar, bederatzigarren urtez, eta giro ederra izanen da seguru, uneoro trikitilariek alaituta.
Nobedade batekin hasiko dute festa, gainera: emanaldia eskainiko du Goizuetako Umore Ona abesbatzak kanpinean, 12:30etatik aurrera.
Taloetan, aukera zabala
Abesbatzaren saioa bukatuta, urteroko zita nagusiari eginen diote bidea; talo jateari, hain justu. Bazkalorduan izanen da hori, eguerdiko 14:00etan hasita, eta Goizuetako talogileek eginen dituzte taloak, gustu guztietarako gainera: hirugiharra, txistorra, gazta eta txokolatea. Eta nola ez, edaria ere izanen da laguntzeko, sagardoa eta ardoa; baita kafea eta kopa ere.
Arratsaldeko plana, berriz, toka txapelketa izanen da, 17:00etatik aurrera.
Txartelak salgai, Iskibin eta Amaian
Euskal Jairako txartelak, dagoeneko salgai daude: Iskibi kanpinera joanda edo telefonoz (948 51 42 77); eta Goizuetako Amaia kafetegian.
Helduen txartelak 16 euroan daude, eta haurrenak 6 euroan.