Partiduz partidu, puntuz puntu, eta beti lanean. Ideia horrekin ekingo dio Hernanik bihar, beste behin, Ohorezko Mailari. Eta beste behin, kategoriari eustea izango da helburu nagusia; eta azken partidura arte sufritu gabe bada, hobe!
Bihar, ordea, sufritzea dute aurreikuspena, oso partidu zailarekin hasiko baitute liga trikoloreek. Eguerdiko 12:30etan hasita, San Roman zelaian ariko dira, Santanderren, Independienteren kontra; aurreko denboraldian hirugarren izan zen taldearen kontra, hain zuzen ere.
Etxeko jokalariez osatutako taldea, beste urte batez
Gainerako taldeen fitxaketen aurrean, bere filosofiari eutsiko dio Hernanik, beste urte batez. Etxeko jokalariekin osatutako taldea aterako du zelaira, iazkoaren oso antzekoa. Aldaketarik ez da izango ia, eta berriak, azpiko taldeetatik igotako jokalariak izango dira.
Bi bajarekin ekingo diote sasoi berriari, min hartuta baitaude Tony Jones eta Igor Etxeberria. Gainerakoek bultza beharko dute Santanderren, punturen bat ekarriko badute, ligari ondo ekiteko. Eta zergatik ez ezustekoa eman?
Mailari eustea izango du helburu Hernanik, beste urte batez.
Denboraldiko klabea, hala ere, Landare izango da berriro ere. Jokalariek bakarrik ez, zaleek ere majo bultzatzen dute etxeko partiduetan, eta bertan lortutako puntuak oso garrantzitsuak izango dira, helburua betetzeko.
Gainerako taldeek, lagunartekoak
Hernaniko beste taldeak, lagunarteko partiduetan murgilduta daude oraindik. Landaren jokatuko dute seniorren bigarren eta hirugarren taldeek, gaur eguerdian; triangularrak Hendaian, kadete eta infantilek, gaur arratsaldean; eta Saran ariko dira txikienak.