Udaran ere dantzatu nahi izan duenak, aukera zabala izango zuen, festaz festa. Baina erromeria gogoz egongo dira asko, eta ez dute gehiago itxaron beharko. Gaur ekingo diote Hernanin, Euskal Jaiak aprobetxatuz, larunbat arratsaldetako erromerien sasoiari. Eta beti bezala, Jeiki Hadi taldeak jarriko du erritmoa: Patxi Añorga trikitixarekin, Joseba Zabalo panderoan, Agustin Ibañez baterian, eta Itziar Azurmendi musiko esatari lanetan, pausoak markatzen. Añorgarekin hitz egin du Kronikak.
Sasoi berria hasiko duzue gaur. Nola ekingo diozue?
Ba gogo haundiz, egia esan. Bukatu ditugu jaiak, eta berriro erromeriekin martxan jartzeko gogoz gaude.
Euskal Jaietan aurrenekoa; berezia izaten da?
Egun seinalatua da, eta jende gehiago biltzen da. Kanpotik ere etortzen dira, aurreneko erromeria delako gainera, eta oso giro polita sortzen da.
Pentsatzen dut jendea pilak kargatuta etorriko dela, eta beraz, animatu daitezela denak, dantza egitera!
«Gure erromerietan, musikoak jotzen ditugu, dantza motelagoak eta salto eta mugimendu gutxiagokoak; eta horrela, helduak gehiago animatzen dira, baina gazteak gutxi izaten dira».
Urteko zein garaitan animatzen da jende gehien?
Bereziki sagardo garaian, otsaila eta martxoan. Jendetza biltzen da larunbat horietan, eta ederra izaten da. Baina beste egun seinalatuetan ere, Euskal Jaietan bezala, jende asko etortzen da kanpotik.
Garai batean jende gehiago animatuko zen...
Bai bai, lehen edozein jaitan jende asko animatzen zen, erromerietan dantza egitera. Kalean egoten ziren denak, eta lotsa gutxiago zeukaten gainera. Orain lotsa gehiago dauka jendeak, eta ondo dantza egiten jakin gabe, ez dira animatzen.
Aldatu dira erromeriak?
Asko aldatu dira, bai. Gure erromerietan, muxikoak jotzen ditugu, dantza motelagoak eta salto eta mugimendu gutxiagokoak; eta horrela, helduak animatzen dira gehien. Gazteak, ordea, gutxi izaten dira; estilo mugituagoak nahiago izaten dituzte...
Zaila al da erromerietan dantza egitea?
Kontrakoa, dantza errazak dira jotzen ditugunak. Fandangoek, arin-arinek, balsek... gaitasun gehiago eskatzen dute. Baina muxikoak errazak dira, dantza berriak dira, desberdinak, eta horrek bultzatu du jendea, animatzera.
Gainera, Hernanin erromeriak jotzen hasi ginenean, 2013an, erakustaldiak egiten genuen, jendeak ikasteko nola dantzatzen den bakoitza. Orain ez ditugu egiten, datorrenak ezagutzen dituelako dagoeneko, aurrekoetatik. Eta berriek, ez dakitenek, berehala harrapatzen dute, dantza oso errazak dira eta.
«Lehen edozein jaitan jende asko animatzen zen, erromerietan dantza egitera; lotsa gutxiago zeukaten. Orain, ordea, ondo dantza egiten jakin gabe, ez dira animatzen».
Dantza berririk sartzen al duzue tarteka?
Jende gutxiago dagoenean bai, tarteka sartzen ditugu dantza berriak, eta erakustaldia egiten dugu, jendeak ikasteko. Baina berriak ere, errazak izaten dira.
Jende asko dagoenean, ordea, ezagunak diren dantzak bakarrik jotzen ditugu, errazenak. Erromeria normala eskaintzen dugu. Izan ere, horrelakoetan desmadre bat izaten da hain ezagunak ez direnak jotzea, batzuek ez dutelako azkar harrapatzen.
Zuk, Patxi, zenbat urte daramazkizu trikitixarekin?
Ia bizitza osoa. 12 urterekin hasi nintzen, eta 37 dauzkat. Beraz, 25 urte daramazkit dagoeneko: txapelketetan parte hartzen, irakasle bezala ere bai, erromerietan... Jotzea da gehien gustatzen zaidana, disfrutatu egiten dut taula gainean. Nire bizitza da. Eta aurten, gainera, errekonozimendua ere jaso dugu, urte guzti hauetan egindakoagatik: omenaldia ere egin ziguten Irunen, txotx garaian.