Hernaniko Argazki Forumak antolatuta, Argazki Digitalen 15garren Rallya egingo da etzi. Haur nahiz helduek parte hartu ahal izango dute, betiere, egunean bertan izena ematen badute. Horretarako, antolatzaileek mahai bat jarriko dute: goizeko 09:00etatik 10:00etara egingo da hori, udaletxeko arkupe txikian.
Gaiak, momentuan
Parte-hartzaileek bi mailatan lehiatuko dute: 12 urtekoak, alde batetik; eta 13 urtetik gorakoak, bestetik. Behin izena emanda, momentuan zehaztuko dira aurtengo rallyko gaiak, eta eguerdiko 14:00ak arte izango da aukera argazkiak ateratzeko.
09:00etatik 14:00etara ateratako argazkiak izateaz gain, ezinbestekoa izango da argazkiak Hernanin egindakoak izatea.
Eguerdiko 14:00etan bukatuko da rallya, eta ordurako, partehartzaileek argazkiak deskargatuta izan beharko dituzte. Horretarako 13:00etatik 14:00etarako tartea jarri dute, Ave Marian.
Denera, zazpi sari
Partehartzaile guztien artean, zazpi sari banatuko dituzte; lau helduen mailan, eta hiru haurrenean. Sari banaketa urriaren 6an egingo da, Biteriko areto nagusian.