«JOAN den larunbatean, goizeko lauetan, kamuflatutako Guardia Zibilaren bi kotxek Mirentxinen furgoneta gelditzera derrigortu zuten autopista erdian; Kordobara bisitan zijoan senideen furgoneta zen, eta armak lehiatilatik aterata geldiarazi zuten»; gertatutakoa azalduz hasi zuten atzoko prentsaurrekoa, Etxerat Elkarteko eta Mirentxin Elkartasun Kolektiboko lau kideek: Urtzi Errazkin, Patrizia Belez, Unai Lamariano, eta Xabier Berrak, hain zuzen.
Ondoren, gertatutakoaren xehetasunak eman zituzten: «ibilgailuko ateak ireki, gidariari pistola buruan jarri, kanpora atera, eta lurrean etzatera derrigortu zuten. Gauza bera egin zuten bere kidearekin: eskuburdinak jarrita eskuak bizkar atzean jarri zizkioten, eta agente bat bere gainean jarri zen, asfaltoaren kontra mantenduz».
Orduan, Mirentxineko bi gidarien kontakizunaren arabera, operatibo antiterrorista bat zela oihukatu zieten Guardia Zibilek, eta lau senideak furgonetatik atera zituzten. «30 segundutan furgoneta begiratu eta konfunditu egin zirela esan zuten», azaldu zuen Xabier Berrak, gidarietako batek: «’barkamena eskatzen dizuegu nahi baduzue onartu, bestela, ez’, esan ziguten».
Bukatzeko, beste gidariak, Unai Lamarianok salatu zuen «gertatutakoa nahiko larria izan zela».
Ildo beretik, Etxerat
Etxerat Elkarteak, halaber, gogor salatu zuen gertaera: «Akats bat izan zen? Ohituegiak gaude gure senideak bisitatzeko ex-profeso antolatutako kontroletara, eta ‘zorizkoak’ diruditen beste batzuetara ere bai... gu bakarrik gelditzen gaituzte; ohituegiak jazarpen eta jarraipen polizialetara, gertaera hauetan akats sinple bat baino ez ikusteko».
Horrez gain, Mirentxineko bi gidariei «elkartasuna» adierazi zieten, baita «errekonozimendua eskaini, dispertsioaren karga arintzeko egiten duten lanari».