«Hernaniarrak zoriontzeko» egin zuten prentsaurrekoa atzo Luis Intxauspe alkateak eta Mattin Aldaia ingurumen zinegotziak. Izan ere, Intxauspe alkateak azaldu zuen hondakin sistemagatik «munduan zehar zoriondu egiten gaituzte, eta ez da Udala zoriontzea, hernaniarrok zoriontzea da».
Txilen, azkenekoz
Zoriontze horien seinale da, alkateak azaldu zuenez, «zenbat lekuetara gonbidatu izan duten Hernani gure esperientzia, datuak, ohiturak eta ekimenak azaltzera». Azkena, Txile izan da. Bertan egin diren Zero Zabor Nazioarteko bi Biltzarretan (Santiagon eta Temucon) izan zen Luis Intxauspe alkatea Hernaniren ordezkari moduan. Eta berak dioenez, han ere «Zoriondu gaituzte gure hondakinak etxean behar bezala sailkatzen ditugulako, birziklatze tasa haundia dugulako, %80tik gorakoa, eta konpostatzen dugulako. Eta hau dena hernaniarrok gure eguneroko ohitura eta jarduera onekin lortzen dugulako».
Beste hainbat tokitan ere bai
Baina aurretik, beste hainbat tokitan ere izan dira Udaleko ordezkariak: «Galizan izan gara, konpostajeari buruz hitz egiten [...]; Manresan eta Bartzelonan, herrialde katalanetan; Madrilen ere bai; eta Europako hainbat herrialdetan Europe Zero Waste taldeak gonbidatuta: Capannori (Italia), Paris, Bruselan; eta noski, etxean ere bai: Donostian edo UEUko ikastaroan».
Hernanira ere, bisitan
Hernanira leku askotako jendea etorri dela azaldu dute Udal ordezkariek, «hondakin bilketa ezagutu, konpostagailuak ikusi eta ikastera». Hain juxtu, Las Palmasetik etorri ziren atzo; aurretik, Galiziatik, Frantziako Brivetik eta Bristoletik ere etorri izan dira, besteak beste.
«Ondo ari gara»
Hortaz, borobildu zuen Mattin Aldaia zinegotziak, «Hernanin ondo ari gara: % 80tik gora birziklatzen dugu, pertsona bakoitzak urteko 53 kilo errefus soilik sortzen dugu». Beraz, dio: «zailena egin dugu, eta gure erronka azken errefusa, benetako zaborra, murriztea da eta gutxiago kutsatzen ahalegindu behar dugu».
Ondorioz, Aldaiaren hitzetan: «ondo ari gara eta demostratu dugu erraustegia ez dela beharrezkoa gure hondakinak kudeatzeko, eta gainera, badakigu osasunarentzat oso arriskutsua dela».