Berdintasun Kontseiluaren aldarrikapenari jarraituz, 2013an sortu zen Plaza Feministako espazioa txiki geratu denez, Emakumeen Etxea sortuko du Udalak datorren urtean. Gabriel Zelaiako aurreko eraikinean kokatuko dute eta nolako izango den definitzeko, partaidetza prozesu bat jarriko du abian Udalak, Aztiker Soziologia Ikergunearen laguntzarekin.
Parte-hartze prozesua nola gauzatuko den azaltzeko, prentsaurrekoa eman zuten atzo Garazi Etxarri zinegotziak eta Maitane Barrenetxea Aztiker Soziologia Ikerguneko teknikariak.
Hiru fase
Maitane Barrenetxeak azaldutakoaren arabera, Emakumeen Etxea definitzeko datorren astean abiaraziko den prozesuak hiru fase izango ditu. Aurrenekoan, etxearen izaera eta ezaugarriak definituko dira, hau da, «nolakoa izatea nahi dugun, zein helburu izango dituen...». Bigarren fasean, espazioaren antolaketa eztabaidatuko da, aurretik definitutako beharren arabera egituratuko da espazioa. Eta hirugarren eta azkenekoan, antolaketa eta funtzionamendua izango dira hizpide.
Barrenetxeak azaldu duenaren arabera, «datorren astean hasi eta urtarrila-otsailera bitarte iraungo du prozesuak; denera, 6 bat saio izango dira». Prozesu parte-hartzailea denez, erabat irekia izango dela azaldu dute.
Gainera, etxea antolatzeko garaian, bigarren fasean, auzolanean lana egiteko aukera ez dute baztertzen: «prozesuak berak esango du; ez dugu esaten egingo dugunik, parte hartzen dutenek erabakiko dute».
Hasteko, jardunaldi berezia
Emakumeen Etxea nola izango den definituko duen prozesuari hasiera berezia emateko, jardunaldi berezia antolatu dute datorren asteko larunbaterako, hilaren 24rako, alegia.
Egun osoko egitaraua antolatuko dute horretarako: hitzaldiak, tailerrak, antzerkiak eta emanaldi berezia.
Agenda publikoan txertatzea, helburu
15 laguneko herritar talde batek, Aztiker eta Udalarekin elkarlanean sortutako egitaraua da hilaren 24koa: «helburua da gaia sozializatzea, herrian plazaratzea, eta agenda publikoan txertatzea».
IRAILAREN 24KO EGITARAUA
09:30, Aurkezpena
09:45, Emakumeen etxeak eta
feminismoaren eraldaketak, Mari Luz Esteban Galarza.
10:45, Atsedenaldia
11:15, Emakumeen Topalekuen esperientziak ezagutuaz: Basauri, Arrasate eta Ermua.
12:30, Hernaniko Berdintasunaren aldeko eta mugimendu feministaren txango historikoa
14:00, Klownklusioak, Virjinia Imaz Quijera.
20:00, Ekhiñe, Kandela eta Pantxaren kondaira, ibilaldia Zinkoeneatik.
21:00, Andrekale, ikusentzunezkoaren emanaldia Andre kalean (euria egingo balu, udaletxeko aterpean).