Bihar bukatuko da Astigarragako igerileku denboraldia, eta aurten, Hernaniko igerilekuan obrak egingo direla eta, Astigarragako kiroldegiko bazkideek Donostiako bi kiroldegi erabili ahal izango dituzte, igeriketa egiten jarraitzeko.
Hain zuzen, astelehenetik aurrera, Donostiako Paco Yoldi eta Etxadiko kiroldegietako igerilekuak izango dituzte aukeran.
Bazkide txartela, nahikoa
Astigarragako Udalak Donostiakoarekin adostasuna lortu zuen, herriko bazkideek aipatutako kiroldegiak erabili ahal izateko. Izan ere, Astigarragako igerileku denboraldia bukatzean, Hernaniko igerileku itxiak erabiltzen dituzte astigartarrek, baina hauek itxita egongo dira urtebetez, obrak egin bitartean.
Horregatik, Paco Yoldi eta Etxadi kiroldegietako igerileku itxiak erabili ahal izango dituzte. Nahikoa izango da Astigarragako bazkide txartela eramatea: «Donostiako instalazioen erabilerak ez du eragingo inolako bazkidetza kuotaren igoerarik», azaldu du Udalak.
Astigarragako obrak ere, aurrera
Bestalde, Udalak jakinarazi du Astigarragako kiroldegiko obraren bigarren fasea ere, hasi dela. «Etapa honetan, fitness eta muskulazio gela lehenengo solairura igo eta aireztatze-sistema hobetuko da», azaldu du.
Era berean, gehitu du «Astigarragan obrak egin arren, instalazio guztiak normaltasunez» erabili ahal izango direla.