Protokoloa osatu berri dute elkarlanean, Udaleko Gizarte Zerbitzuek eta Hernaniko Institutuak. Helburua da, babesik gabe egon daitezkeen adingabe eta familiei laguntza ematea. Kronikara bidali duten prentsa oharrean azaldu dutenez, protokolo hau bi erakundeak urteetan egiten ari diren elkarlanetik abiatu da: «adingabeei eta familiei erarik egokienean laguntzeko modua bilatu nahi da. Adingabeen eta euren familien ongizatea da lehentasuna».
Azaldu dute, bizitzan zehar hainbat gertaera izan daitezkeela ongizate hau arriskuan jar dezaketenak: «egoera horietarako bitartekoak jartzea da helburua».
Protokoloan zehazten da bi erakundeen arteko koordinazioa
Oharrean diotenez, joan den ikasturtean eratu zen protokoloa osatzeko lan-taldea, bi erakundeetako profesionalekin: «bertan, ordura arte egindako lanaren azterketa egin eta aurrera begirako pausoak ezarri ziren. Protokoloan zehazten dira nola koordinatuko diren bi erakundeak. Bestalde, lantalde bat izendatu dute Institutuko eta Gizarte Zerbitzuetako profesional ezberdinek osatua».
Hitzarmena ere, sinatua
Protokoloarekin batera, hitzarmena ere sinatu zuten Xabier Lertxundi Asteasuinzarrak, Udaleko Gizarte Zerbitzuetako presidenteak eta Amaia Urzelai Azkunek, BHIko zuzendariak. Hitzarmen honi esker, Udalak gaiaren inguruko formazio espezifikoa eskainiko die Institutuko irakasle guztiei, datorren astetik aurrera.
Bi alderdiek azaldu zutenez, garrantzitsua da bi erakundeak elkarlanean aritzea: «askoz ere emaitza hobeak lortzen direlako». Pozik agertu ziren egindako lanarekin.
Bestalde, azaldu dute Udala lanean ari dela beste ikastetxeekin ere: «joan den urtean ikastaro bera eman zitzaien haur eta lehen hezkuntzako irakasleei, eta aurrerantzean ere, gainontzeko ikastetxeekin osatu nahi dugu protokoloa».