2015eko Aurrekontu Partehartzaileetan hernaniarrek erabakitako beste proposamen bat aurkeztu zuten atzo eguerdian Udalean: baztertze arriskuan dauden herritarrei interesik gabeko mikrokredituak ematea ahalbidetuko du proiektuak. Hernaniko Udaleko alderdi ezberdinetako ordezkariak, eta Fiare, Kaleratzeak Stop eta Amher elkarteko kideek egin zuten aurkezpena.
«30.000 euroko poltsa da»
Luis Intxauspe alkateak azaldu zuenez, Hernani Erabaki prozesuan erabakia hartu zenetik lanean aritu dira proposamena martxan jartzeko. Kaleratzek Stopen proposamena izan zen, eta boto mordoa jaso zituela ekarri zuen gogora Alkateak: «prozesua luze joan da eta zaila izan da Fiare eta Udalaren arteko entramatua enkajatzea; horretan pasa genuen 2015 urtea. Baina lortu genuen eta eragileekin mahaia osatu zen ondoren. Bertan zehaztu ziren baldintzak, itzultzeko epeak... 30.000 euroko poltsa izango da, eta bihartik aurrera izango da eskaerak egiteko aukera».
«Gizarteratze prozesuarekin bat egiten duen tresna da»
Saioa Bacigalupek hartu zuen ondoren hitza, Fiareko ordezkariak. Gogoratu zuen, mikrokreditu programaren helburu nagusia dela bazterketa arrisku egoeran dauden pertsonen behar puntualei aurre egitea, interesik gabeko maileguak emanez. Bacigalupek azpimarratu zuen, gizarteratze prozesuarekin bat egiten duen tresna izango dela, maileguak itzultzen diren neurrian, beste batzuk eman ahal izango direlako: «horrela, onuradunek programa bera elikatzen dute bere konpromisoarekin». Era berean, gogoratu zuen proiektu hau aitzindaria dela.
«Pausu txikia da, baina esanguratsua»
Kaleratzeak Stopeko Kike Riañok hiru ardatz azpimarratu nahi zituela esan zuen aurkezpenean. Batetik, 30.000 euroko fondo hau pausu txiki bat dela, baina era beran, esanguratsua ere badela: «ez da banketxe bat erreskatatzeko, baizik eta kontrakoa. Horregatik proposatu genuen 2014an. Orain lanean jarraituko dugu denborarekin fondoa haunditu dadin».
Bestetik, gogoratu zuen proiektu hau demokrazia partehartzailean dagoela oinarritua: «herritarren batzorde bat sortzea proposatu genuen, benetako demokrazian jendea inplikatu egin behar baita. Gure ustez, bidea ez da politika politikoen esku bakarrik uztea».
Azkenik, azpimarratu zuen ekimen hau ez dela partidista, ez dela kolore bakarreko ekimena: «herritarrek bizi duten egoera ez da justua. Ekimen hau hain da oinarrizkoa, ez duela kolore politikorik».
AMHER elkarteko Alfonso Gutierrez aurretik esandako guztia berretsi zuen, eta eskatu zien beharra duten herritarrei apurorik ez izateko, eta behar badute, eskaera egiteko.
Azkenik, Hernaniko Fiareko ordezkari gisa, Nekane Idarretak dei egin zien herritarrei, halako prozesuetan parte hartzera.
Nola eskatu daitezke mikrokredituak?
Aipatu bezala, mikrokredituetarako poltsa 30.000 eurokoa izango da, eta mailegua 6.000 euro artekoa izango da, interesik gabea, eta 5 urtetan itzuli beharrekoa.
Eskaerak udaletxean bertan egin behar dira, Herritarren Harrera Zerbitzuan (HZZ); baita ere egin daitezke ekimenaren parte diren elkarte ezberdin bitartez. Eskaera egin nahi dutenek bete beharreko gutxieneko baldintzak dira: oinarrizko gastuei aurre egiteko larrialdi egoeran egotea eta gutxienez urtebetez Hernanin erroldatuta egotea. Eskaera orria eta dokumentazioa aurkeztu ostean, baldintzak betetzen diren aztertuko da. Batetik, gizarte langile batek aztertuko du bazterketa arrisku egoeran dagoen kasua. Eta bestetik, Fiarek aztertuko du bazterketa finantziarioa dagoen eta maileguaren itzulketaren proposamena.
Ondoren, bi informe hauek aurkeztuko zaizkio elkarte ezberdinek osatutako batzordeari. Aurrera egiten badute, Fiare eta pertsona horren artean mailegu pribatu bat sinatuko da, interesik gabea. Jarraipena hilerokoa izango dela zehaztu dute.