Izenematea ireki da Astigarragako Kultur Etxean emango diren ikastaroetarako. Beste hainbat elkartek eskaintzen dituzten ikastaroetan ere, zabalik dago apuntatzeko epea.
Lau ikastaro, kultur etxean
Kultur etxeko eskaintzan lau ikastaro mota izango dira aukeran, baina maila kontuan hartuta, bost izango dira, guztira.
Batetik, urritik abendura arte emango diren ikastaroak antolatu dira: dantza latinoak, hastapeneko mailakoa edo maila aurreratukoa; eta yoga.
Bestetik, urritik ekainera bitarteko ikastaroak daude aukeran: joskintza eta zura tailatzea.
Izena emateko moduak eta baldintzak
Ikasturtea urriaren 3ko astean hasiko da, eta izenematea dagoeneko zabalik dago, kultur etxean bertan edo 943 33 50 64 telefonoan.
Astigarragan erroldatutakoek izena emateko lehentasuna daukate hilaren 15era bitartean. Gainera, %25eko beherapena egingo zaie bertan erroldatutako erretiratu, langabe eta pentsiodunei.
Ordainketa modua, berriz, desberdina izango da ikastaroen iraupenaren arabera: urte osokoak bi epetan ordaindu beharko dira, urrian eta urtarrilean, eta hiruhileko ikastaroak, epe bakarrean.
Hizkuntza, izena ematen dutenen araberakoa
Ikastaro bakoitza zein hizkuntzatan emango den, ez dago zehaztua. Ikastaro bakoitzean, bertan izena ematen duen gehiengoaren hizkuntza ezagutzaren arabera aukeratuko da.
Beste bost ikastaro ere aukeran, elkarteetan
Bestalde, kultur etxeko ikastaroez gain, bestelako bost ere izango dira aukeran, herriko elkarteen eskutik.
Horietako bat da, AEK euskaltegiak euskera ikasteko martxan jarriko duen eskaintza. Izena eman daiteke, dagoeneko, kultur etxean, eta informazio gehiago behar duenak bulegoan (Kale Nagusia, 48) galdetu dezake astelehen eta asteazkenetan, goizeko 09:00etatik 13:00etara edo astearte eta ostegunetan, 17:30etatik 19:30etara. Telefonoa eta helbide elektronikoa ere badauzkate, aukeran: 607 610 687/astigarraga@aek.eus. Maila eta behar guztietara egokitutako ikastaroak dauzkate aukeran, eta edozein motatako azterketak prestatzen ere laguntzen dute; baita bestelako zalantzak argitzeko laguntza ere.
Euskal dantzak ikasi nahi dituzten haur edota helduek, berriz, Astigar dantza taldearen lokalean izango dute aukera. Izena emateko bi egun jarri dituzte: hilaren 15a eta 16a.
Era berean, pintura eta marrazketa ikastaroa egin ahal izango da Astigarte elkartearekin, eta hemen ere, bi egun izango dira izena emateko: hilaren 17 eta 24, kultur etxean.
Azkenik, Harituz elkarteak bi ikastaro jarri ditu aukeran: Emakumeentzako Qi Gong, eta Bizitzaren Filosofia. Azken hau, gainera, debaldekoa izango da. Izena emateko, 610 202 268 telefonora deitu behar da.
KULTUR ETXEKO IKASTAROAK 2016-2017
URRITIK ABENDURA
Dantza latinoak (maila aurreratua): hileko aurreneko hiru astelehenetan, 20:00-21:30. Hileko laugarren astelehenean, bi taldeen dantza saioa 19:30-21:00. Prezioa: bertakoek 40 euro; kanpokoek, 48 euro.
Dantza latinoak (hastapena): hileko aurreneko hiru astelehenetan, 18:30-20:00. Hileko laugarren astelehenean, bi taldeen dantza saioa 19:30-21:00. Prezioa: bertakoek 40 €; kanpokoek, 48 €.
Yoga: astearteetan, 09:30-11:30 edo ostegunetan, 18:30-20:00. Prezioa: bertakoek 50 euro; kanpokoek, 60 €.
URRITIK EKAINERA
Joskintza, ebaki eta josi (aurreratua): ostiraletan, 18:00-20:00. Prezioa: bertakoek 158 €; kanpokoek, 190 €.
Zura tailatzea: asteazkenetan, 14:30-17:30 edo 17:30-20:30. Prezioa: bertakoek 238 euro; kanpokoek, 285 euro.
BESTALEKO IKASTAROAK
Euskera, AEKn: Izenematea, irailaren 5etik aurrera kultur etxean. Informazioa: astelehen eta asteazkenetan, 09:00-13:00 eta astearte eta ostegunetan, 17:30-19:30. Telefonoa: 607 610 687. Emaila: astigarraga@aek.eus.
Euskal dantzak: haur eta helduenzat. Ikasturte osoa, 90 €; 3 senidek, 250 €. Izenematea irailaren 15 eta 16an, 19:00etan Astigar elkartearen lokalean.
Pintura eta marrazketa: larunbatetan 09:00-11:00 edo 11:00-13:00 eta ostegunetan, 17:00-18:00 (10 urte artekoentzat). Izenematea: irailaren 17 eta 24an kultur etxean. Prezioa: 26 euro hilean; haurrek, 15 euro.
Emakumeentzako Qi Gong: gorputz mugimendu arinak, kontzentrazioa eta arnasketa, Harituz elkarteak antolatua. Astelehen eta asteazkenetan, 09:30-11:00. Prezioa: 35 euro hilean. Izenematea: 610 202 268.
Bizitzaren filosofia: Hilean bi ostiraletan, 10:00-11:30. Harituz elkarteak antolatua, debalde. Izenematea: 610 202 268.