Orain dela 2 edo 3 urte hasi zen Victor Goikoetxea pintore hernaniarra buruari bueltak ematen. «Donostiari 2016ko Kultura Hiriburutza aitortu ziotenean, Donostiako lau sarreretarako proiektua aurkeztu nuen; formato haundiko pintura eta eskultura teknikak gustatzen zaizkit». Baina ez zuten aukeratu. Hala ere, ez zuen etsi, eta Xabier Barrutieta arkitektoarekin topo egitean, elkarlanean hasi ziren.
Pasa den uztailaren 14an inauguratu da Donostiako Miramar tunel peatonalean, ItsasArte-MiramArt 2016 obra.
Esperientzia sentsoriala
Berrikuntzaren alorrean sakondu zuten Barrutietak eta Goikoetxeak, eta diziplina asko nahastea erabaki zuten. «Horrek erakarri gintuen gu eta patrozinatzaileak, hau sortzeko dirua jarri dutenak», dio Goikoetxeak.
Izan ere, aurrena ikusten dena, tuneleko sabaia da, Goikoetxeak margotua, itsasoa oinarri, eta argi jolasa. Baina sarreran informazio totema dago, bisitariari elkar eragiteko aukera ematen diona; informazioa jaso eta iritzia eman dezake, eta zuzenean, debaldeko pintxoa lortzeko mezua jasotzen du telefonoan. Era berean, sentsoreek, zenbat jende pasatzen den kontatzen dute, eta totemaren pareko baldosek, zapaltzean, energia sortu.
«Nere ikuspegi artistikotik, abstrakzioa da, itsasoari begira sortua. Baina esperientzia sentsoriala sortu nahi genuen. Ez da tubo bat. Hori izan da zailena, denak bat egitea: nere lanak, Xabierrenak, argiztatzaileenak...», azaltzen du Goikoetxeak. Barrutietarentzat, berriz, «espazio berezi bat, iza–era eta arimarik gabea, transformatzea» izan da kontua. «Eta inguruan integratzea. Donostian denak egiten du bat».
580.000 bisitari, uztailean
Urtebete material berriak probatzen pasata, azkenean martxan dago obra, eta bisitarien iritziak jaso dituzte. Goikoetxeak «itsaso sentsazioa» sortu nahi izan du; «gainera, sentsazioa desberdina da, egunez eta gauez». Barrutietarentzat, berriz, «inguratu eta norabait garraiatzen zaituen tunela da». Eta bisitarien arrera ere, positiboa izan da. «%95ek azaldu du gustatu zaiola, eta uztailean 580.000 bisitari erregistratu dira!».
Goikoetxea gustora geratu da: «onena da gerora tunelarekin identifikatu nazatela», dio. Era berean, «herriari oparitutako ondarea, bertan geratuko dena» dela nabarmentzen dute biek. Zertara iritsiko den? Auskalo! «Denborak guztia bere tokian jartzen du; ez dago besterik!».