Oporren aurretik Udalak jakinarazi zuen bezala, urtebetez itxiko dute kiroldegiko igerilekua berritze-lanak egiteko. Hori dela eta, ekainean Donostiako Udalarekin sinatutako hitzarmenaren bidez, Amarako Paco Yoldi eta Aieteko Etxadiko igerilekuak erabili ahal izango dituzte Hernaniko bazkideek.
Ordutegi zabala, bi kiroldegiek
«Hernanitik gertu dagoelako eta garraio publikoan erraz iritsi daitekeelako» erabaki zuen Udalak Donostiako Udalarekin akordioa sinatzea. Izan ere, Amarako Paco Yoldira A1 autobusean joan daiteke; eta Aieteko Etxadira, aldiz, G1 autobusa iristen da.
Gainera, ordutegi zabala daukate bi kiroldegiek. Etxadik 07:30etatik 22:00etara irekitzen ditu ateak astean zehar, 09:00etatik 20:00etara, larunbatetan; eta 09:00etatik 14:00etara, igande eta jaiegunetan. Paco Yoldik, aldiz, 07:00etan hasten du jarduna astean zehar, eta 08:00etan, larunbatetan; igandeetan, ordutegi bera daukate biek.
Izenematea oraindik, irekita
Kiroldegiko igerilekuaren eraikin zatia duela bi aste bota bazuten ere, beste zatia normaltasunez erabiliko da lanak iraun bitartean. Hori dela eta, aurten ere antolatu dituzte kiroldegiko ohiko ikastaroak. Abuztuaren 1ean ireki zuten izenematea, taldeak bete arte, eta urrian hasiko dira klaseak.