Egitasmo berria jarri du martxan Ta Puntu Kooperatibak irailerako: Puntu Soziala.
Kooperatibak jakinarazi du egitasmo hau sortu dela «urtero gizarteari ekarpen positiboa egiten dion proiektu batek sarean duen presentzia hobetzeko». Horretarako, saria emango diote «gizarteko edozein arlotan eragin positibo bat duen norbanako, elkarte edo enpresa» bati.
Egitasmo berria irabazi asmorik gabekoa izango da eta PuntuEUS Fundazioaren laguntza izango du.
Ta Punturen zerbitzuak, doan
Proiektu saridunak Ta Puntu Kooperatibaren zerbitzuak doan jasoko ditu: «aukeratzen den proiektu sozialak bere zabalkuntzan dituen arazoak aztertuko dira Ta Punturen eskutik, zailtasun eta erronkak identifikatuz. Aurrera begirako aukerak atzeman eta hauek lortzeko estrategia garatuko dute. Amaitzeko, urtebeteko plangintza bat osatuko dute elkarrekin». Gainera, behar izanez gero, eragile gehiagoren elkarlana gauzatuko dela jakinarazi du Ta Puntu Kooperatibak oharrean.
Proposamenak, irailaren 29ra arte
Puntu Soziala egitasmoan parte hartu nahi duten enpresek gaurtik irailaren 29ra arte izango dute proposamenak aurkezteko aukera. www.puntusoziala.eus webgunetik egingo da hori, eta behin proposamen guztiak jasota, irailaren 30ean jakinaraziko dute zein izan den saritua.