Sagardorik gabe, ez dago festarik Euskal Herrian, ezta Portu auzoko jaietan ere. Bihar izango da ohiko sagardo dastaketa eguerdiko 12:30etan, eta bertan izango dira Hernani eta inguruko sagardogileak: Altzueta, Oialume-Zar, Olaizola, Eula, Akarregi, Alberro, Elorrabi, Iparragirre, Artola, Itxas-Buru, Otsua-Enea eta Rufino.
Helburu solidarioa
Urteroko zita da biharko sagardo dastaketarena, baina aurten berezia izatea espero dute. Izan ere, kutsu solidarioa izan dezan, helburu zehatza jarri dute: Zaporeak Proiektuari emango diote jasotzen duten dirua.
Zaporeak, siriar errefuxiatuei laguntzen Chiosen
Intxaurrondoko Gastronomia Elkarteak sortutako egitasmoa da Elkartasun Zaporeak proiektua. «Greziako kostaldeetara iristen ari diren errefuxiatuekin ematen ari den egoera humanitario larriaren aurrean, Chios uhartean lanean ari diren hainbat GKErekin (Gobernuz Kanpoko Erakundeak) bat egin eta egoerari aurre egiten laguntzeko martxan jarri dugu Elkartasun Zaporeak proiektua», azaltzen du taldeak berak.
Urtearen hasieran egin zituzten lanean hasteko aurreneko pausuak, eta martxoan Greziako Chios irlan instalatu ziren bertan zeuden errefuxiatuei jaten emateko, baita inguruan lanean ari diren taldeetako kideei ere (sorosleak, medikuak, psikologoak...).
Elkartasun Zaporeak Proiektura bideratuko da biharko dastaketako dirua.
«Gure boluntarioek gunero 1600-1700 pertsonei ematen diete bazkaria eta afaria»
Hortaz, Elkartasun Zaporeak Proiektuko boluntarioen lana da egunero egunero Chios inguruetan daudenei jaten ematea, taldeak dituen datuen arabera: «Chiosera iritsi ginenetik, egunero 800-1.000 lagun ingururi eman diegu jaten egunero. Gaur egun gure boluntarioek 1.600-1.700 pertsonei ematen diete bazkaria eta afaria. Eta uharteko agintariek esanda, Vialeko gunean sartuta dauden errefuxiatuen janarien kargu egiteko eskaera egingo zaigu laster; hau da, egunero 1.500 otordu gehiago eman beharko genituzke».
Gastuek, gora
Lan hori egiteak hilean hileko gastu finko batzuk suposatzen ditu, besteak beste: sukaldea eta boluntarioen etxebizitzaren alokairua, sukaldea mantentzea (gasa, ura, argia, gasoleoa...), boluntarioen bidaiak, elikagai freskoak, janaria banatzeko furgonetaren gastuak...
Hori guztia ordaintzeko, orain arte, 30.000 euroko gastua izaten dute hilero, baina eskaera berriak gastuak igo egingo dituela aurreikusten du Zaporeak Proiektuak, beraz, etorkizun hurbilean baliteke 40.000 eurora igotzea.
30.000 euroko gastua izaten dute hilero, eta baliteke etorkizun hurbilean 40.000 eurora igotzea.
Laguntza beharra, oraindik ere
Azken hilabeteotan, enpresa, talde eta herritarren laguntza eskuratu du Elkartasun Zaporeak proiektuak Chiosen egiten duen lana aurrera eraman ahal izateko: «haiek guztiek egin dute posible, infernuaren erdian dauden milaka gizon, emakume eta haurrek egunero janaria izatea, baita itxaropen eta poz pixka bat ere».
Baina taldeak ohartarazi nahi du Chiosen egoera ez dela konpondu, eta laguntza hori, oraindik ere, behar beharrezkoa dutela; oraindik badirelako premiazkoak diren hainbat behar: azpiegituraren mantentzea bermatzea; ura, jaki freskoak, haur txikientzat janari bereziak; jana banatzeko tresnak eta ontziak; boluntarioen gastuak; sukalderako tresnak; bulegoko gastuak; eta errefuxiatuen arropa gordetzeko leku baten alokairua (100 metro karratukoa).
Itziar Villalba Chiosen egon den hernaniarra
«Orain ez dute itxaropenik, ezta etorkizunik ere»
Apirilean izan zen Chiosen Zaporeak Proiektuarekin, eta orain egoera asko aldatu dela dio Villalba hernaniarrak.
Zaporeak Proiektua eta errefuxiatuen arazoa dagoeneko aski ezaguna da hernaniarren artean. Herritarren artean, gainera, bada bat bertako egoera gertutik bizi izan zuena, Itziar Villalba, hain zuzen. Apirilean izan zen Chiosen, Elkartasun Zaporeak Proiektuko boluntario gisa: «esperientzia gogorra bezain aberasgarria izan zen Chiosen bizitakoa».
Egoera, gertutik
Hilabete batzuk pasa dira Villalba bertan izan zenetik, baina gertutik jarraitzen du Chiosen gertatzen den guztia: «ni bertan izan nintzenean itxaropen txikia zuten, iritsi eta eraman egiten zituztelako. Orain han geratzen dira, eta oso gogorra da; ez daukate ez itxaropenik, ezta etorkizunik ere».
Hernaniarraren arabera, errefuxiatuen jarioa ez da geratu: «abuztuan 700 errefuxiatu berri iritsi dira Chiosera». Beraz, Elkartasun Zaporeak Proiektuko boluntarioek badute lana oraindik ere.
Aldaketak, otorduetan
Martxoan Chios uhartera iritsi zirenetik, Zaporeak Proiektuko lanak ere hobera egin du. Itziar Villalbak azaltzen duenez, «lehen otordu bakarra ematen zitzaien, eta orain 3 plater jaten dituzte. Gainera, orain behar diren kaloriak ematera iritsi nahi da».
Hori lortzeko, eguneroko dietan hainbat jaki gehitu behar izan dituzte; ondorioz, gastuek ere gora egin dute.
Hainbat GKEren laguntzari esker
Baina erronka honen aurrean Zaporeak Proiektua ez dago bakarrik: «hori ere aldatu da, eta orain, zenbait GKEk (Gobernuz Kanpoko Erakunde) laguntzen diote Zaporeaki». Horri esker, sukalde berri bat estreinatuko dute laster, eta eskola txiki bat eta emakumeentzako txoko bat ere sortu dute.