Emoziorik ez da faltako gaur, Galarretan; Buruz Buruko txapelketako aurreneko finalerdikoa jokatuko da, eta ez nolanahikoa: Urriza eta Uterga, iazko txapelduna eta azpitxapelduna ariko dira elkarren kontra.
Balantza orekatua
Ostegunean aukeratu zituzten gaurko pelotak, Urriza eta Utergak. Aurrenekoa oso momentu onean iritsi da finalerdietara, eta faborito nagusia da, iaz ere irabazi egin baitzuen.
Uterga, berriz, ez da ondo hasi Buruz Burukoan. Barrenetxea IVren kontra alde haundiarekin galdu zuen, eta Aizpuru IIIren kontra ere, nahiz eta irabazi, ez zen guztiz gustora aritu, muskuloren bat minbera duela eta. Baina «gogotsu» dagoela azaldu du, eta «presioa Urrizak» daukala.
Urrizak, bere aldetik, onartzen du momentu onean dagoela, baina Uterga aurkari gogorra izatea espero du. «Gabonetan irabazi egin zidan, eta partidu oso ona jokatuta».
Ezkurra aurkari berriro, Barrenetxea IVk
Buruz Buruko finalerdiaz gain, beste hiru ere jokatuko dira gaurkoan, eta bigarren estelarrean, Barrenetxea IVk jokatuko du. Oraingoan Segurola izango du bikote, eta aurrez aurre, Ezkurra, berriro, eta Ion; Buruz Buruko finalerdian aurkari izango duena, hain zuzen.
Astearteko partiduan 40-33 galdu zuen Barrenetxea IVk Ezkurra IIrekin, Ezkurra eta Etxeberria IIIren kontra. Gaurkoan ere izango da lehia.