Oporrak Bakean programaren barruan, udara Hernanin pasa dute Salka Ali Ramdan, Leila Abdi Embarek, Usama Selma Mohamed Lamin eta Mohamed Moulud Mohamed Uadadi, 10-12 urte bitarteko haur sahararrek.
Hori horrela, Udaleko Lankidetza Sailak «umeei agurra egiteko eta harrera familiei eskerrak emateko asmoz, festa antolatu du», gaur, 19:00etatik aurrera, Tilosetan, eta «herritarrak gonbidatu nahi ditu parte hartzera». Tea, henna tailerra eta haurrentzako jolasak izango dira.
Hernanin 4; EAEn, 325
Oporrak Bakean programa sortu zen errefuxiatu kanpamenduetan bizi diren umeek udako oporraldia bizi-baldintza hobeetan pasa ahal izateko asmoz. Hernaniko Udalak 2003az geroztik egin du bat egitasmoarekin, eta «orduz geroztik, urtero-urtero bideratu du hemengo familiek etxean hartzea Saharako basamortuan, errefuxiatuen guneetan bizi diren haurrak. Ume horien sorterrian bizi-baldintzak ez dira egokienak. Mendebaldeko Sahara Marokok okupatutako lurraldea da, eta ondorioz, milaka saharar errefuxiatu kanpamenduetan bizi dira oso baldintza eskasetan eta nazioarteko laguntza humanitarioaren menpe», argitu du Udalak.
Aurten, 4 ume etorri dira Hernanira; 106, Gipuzkoara; eta 325, EAEra.