Buruz Buruko finalerdietarako sailkatu da Barrenetxea IV, aurreneko faseko bi partiduak ondo irabazita; bat, Uterga, iazko azpitxapeldunaren kontra. Irailaren 3an jokatuko du, Ionen kontra, eta bitartean, uztailean bezala, abuztuan ere rankineko aurreneko postuan mantentzeko lanetan dabil. Asteartean, 40-30 galdu zuen Utergarekin batean, Ezkurra eta Ionen kontra. Gaur, estelarrean, Ezkurra II izango du bikote, Ezkurra-Etxeberria III-ren kontra. Beste hiru partidu ere izango dira, 16:00etan hasita: Beñat-Zubiri/Erburu-Martirena; Otaegi-Larrañaga/ Segurola-Zaldua; eta Goikoetxea V-Garces/Barricart-Otaño.
Asteartean irabazi ezinak zein sentsazio utzi dizu?
Zenbaki aldetik ez naiz gaizki ibili. Sakean 9 tanto, pelota barruan bizi... Normalean baino 4 errore gehiago egin ditut, eta horrek pisua izan du. Baina defentsan ondo, sakean ondo, errebotean okerxeago... Dena ez da irabaztea!
Ion aurkari izango duzu finalerdietan. Bikoteka jokatuta bada ere, trazarik hartu diozu?
Nere ustez, ez dira nahastu behar. Indibidualean, bikotekakoak ez dio eraginik egiten teknika aldetik. Eragiten duena da, irabazita, konfiantza pixka bat. Baina bien zenbakiak hartuta, nereak hobeak dira.
Badirudi, gainera, Endikaren lesioa medio pasa dela Ion finalerdira...
Partidu bat gutxiago jokatu du, eta beraz, aukera haundiagoa izan du. Gutxiago desgastatu da. Baina gehiago erakusteko gogoarekin ere geratu da. Partidu bakarra jolastu, eta galdu egin du, gainera. Horregatik, agian ez da sentsazio onarekin iritsiko finalerdira. Nik bi jokatu ditut, eta bietan irabazi, diferentzia haundi xamarrekin.
Zu, berriz, ikaragarrizko zenbakiekin, eta Utergari, iazko azpitxapeldunari irabazita iritsi zara.
Lehengo urtean finalerdietan jokatutako partidua izan da aurrenekoa, bai, eta arantza kendu dut. Aurten, helburua da Utergaren aurretik geratzea. Urrizak aurreneko postua ondo finkatua dauka, eta badirudi Utergak bigarrena duela, baina...
«Helburua, errealista, bigarren postua hartu eta finkatzea da. Eta Urrizari 29 tanto egitea, ea datorren urterako beldurtzen den!»
Hain zuzen, biak ariko dira elkarren kontra etzi, aurreneko finalerdian. Zer espero duzu? Eta nahiago?
Aurtengo finalerdia, lehengo urteko finala izango da. Oso partidu polita, seguru, eta jende asko erakarriko du. Beste finalerdian, irailaren 3an, Ion eta ni ariko gara. Bakarkakoan ez zaigu inoiz tokatu elkarren kontra aritzea. Ikusiko dugu giroa nolakoa den.
Urriza eta Utergaren artean, nik uste, Urriza bat ez, bi edo hiru koxka gorago dagoela. Utergak partidu bat jokatu du nere kontra, eta galdu egin du. Ipurdi azpiko muskuloren bat minbera dauka, eta Aizpuru IIIren kontra ere, irabazi bazuen ere, ez zen gustora aritu. Urrizaren kontra aritzeko ehuneko ehunean iritsi beharra dago, bestela, astindu ederra emango dizu! Eta bestela ere... Paperaren gainean, behintzat, hala ematen du. Eta nahiago dut. Batzuk uste dute ez dela logikoa; Utergari behin irabazi diotela eta, aukera haundiagoa izango nukeela. Baina ez dut uste gustora geratuko nintzatekeenik. Hemen irabazi behar zaiona, Urriza da. Eta galduz gero ere, Urrizaren kontra galtzea, normala!
Finalean ikusten duzu zure burua?
Zati batean bai. Beti umiltasunez eta partiduak irabaziz ibili behar da, baina uste dut faborito naizela. Hala ere, Ion ez dago ezer oparitzeko! Baina badaukat konfiantza, gora egin dudalako, jokoa hobetu dudalako eta bi partiduak irabazi ditudalako.
Eta txapeldun?
Hori ez dut imajinatu, eta ezta nahi ere! Helburua, errealista, bigarren postua hartu eta finkatzea da. Eta Urrizari 29 tanto egitea, ea datorren urterako beldurtzen den! Baina eskaileraz eskailera iritsi behar da finalera, salto haundia eginez gero, zilipurdika erortzeko arriskua dago eta!