Ikasturte berria ate-joka daukagu, eta Astigarragako kiroldegian, dagoeneko, ireki dute 2016-2017 ikasturtean zehar emango diren ikastaroetarako izenematea. Helduek, irailaren 2ra arte eman dezakete izena kiroldegian bertan, 943 33 36 76 telefonoan edo kiroldegia@astigarraga.eus helbidean.
Haur eta gaztetxoentzako izenematea, berriz, irailaren 5etik 16ra bitartean irekiko da.
Helduek, 14 kirol mota aukeran
Dagoeneko ikastaroetan izena eman dezaketenak, helduak dira. Izan ere, irailaren 12an jarriko dira martxan klaseak, ekainaren 23ra arte.
Guztira, 14 kirol mota probatzeko aukera izango dute aurten: pilatesa, bizkarra zainduz, hirugarren adinekoentzako gimnasia, hipopresiboak (hastapen mailakoa eta mantentze mailakoa), fit pump, ziklo indoor, aerobika, kardio box, zunba, gliding, group pole, hiit, jump fit eta bosu xtreme.
Umeentzat, bost aukera
Gaztetxoagoek, berriz, urriaren 3an hasiko dituzte klaseak, eta hortaz, izenemateak irailaren 5etik 16ra bitartean egin beharko dira.
Bost ikastaro jarri dira aukeran, 4 eta 15 urte bitarteko gaztetxoentzako: zunba, jump fit, irristaketa, soin erritmikoa eta judoa. Adinaren arabera antolatu dira ordutegiak.
Ikastaroak konbinatzea
Ikastaro guztietako prezioak ez dira berdinak, eta bazkideentzako merkeagoak dira, gainera. Bestalde, ikastaro batzuk konbinatzeko aukera ere badago. Informazio guztia kiroldegian ematen dute.