Armairuetatik gona, alkandora, zapia, txapela eta albarkak atera, eta jantziak prestatzen hasteko garaia iritsi zaie hernaniarrei. Beste urtebetez euskal kulturaren hainbat ardatz festa giroan bizitzeko aukera izango dute hernaniarrek asteburuan, euskal jaien barruan.
Egun haundia, larunbatean
Larunbatekoa izango da festetako egun haundia. Baserri mundua herrira ekarri eta herritarrei gerturatzea du helburu, eguneko aurreneko ekitaldiak: abeltzain azokak eta baserriko lanbideen erakustaldiak. Eguerdi partean talo eta txakolin dastatzea, eta aintzinako jokoak izango dira Tilos eta Iturriaga artean. Erraldoi eta buruhaundirik ez da faltako. Eta ezta ere, hain euskaldunak diren herri kirolak. Haurrentzako tailerrak antolatu dituzte arratsaldeko aurreneko orduan; eta dantzarako aukera ere izango du, Jeiki Hadi taldearen trikiti doinuak entzutera gerturatzen denak. Handik aurrera, musika izango da protagonista: Hernani Musika Bandak euskal eta kolonbiar doinuak ardatz izango dituen kontzertua eskainiko du; Roberto Pachecok zuzenduta, bederatzi abesti joko dituzte udaletxeko arkupetan: Alpina fafare, Celedon, Riau Riau, Polka, Diana, Marijaia, Fandangueria, Acuarela eta Colorismo. Eta eguna bukatzeko, beste bi kontzertu antolatu dituzte, Tilosetan, Egiaz itsuturik eta Ingo al deu taldeekin.
Sagarra eta Sagardoaren eguna, igandean
Festak igandean izango du segida, sagarra eta sagardoaren egunarekin. Plaza eta Tiloseta artean izango dira ekitaldi guztiak: diana, sagardo dastaketa, pelota partiduak eta XIX. Trikitixa txapelketa.
LARUNBATA
10:00 Abeltzain azoka eta baserriko lanbideen erakustaldia.
11:00 Talo-dastatzea Iturriaga kalean.
11:30 Antzinako jokoak Tilostean.
12:00 Txakolin-dastatzea Iturriaga kalean.
12:30 Erraldoi eta buruhaundiak.
12:30 Herri kirolak Tilosetako frontoian
17:00 Haurrentzako tailerrak, jolasak eta txokolate jatea Plaza Berrin.
18:00 Erromeria Jeiki Hadi taldearekin, Atsegindegi plazan.
19:45 Musika bandaren emanaldia udaletxeko arkupetan.
22:00 ‘Egiaz itsuturik’ kontzertua eta ‘Ingo al deu’ taldearekin berbena, Tilosetan.
IGANDEA:
Sagarra eta sagardoaren eguna Gudarien plazan
09:00 Diana Txistulari Bandarekin.
11:00 Sagardo dastatzea Gudarien plazan.
11:30 Pelota partiduak (esku eta pala) Tilosetan.
12:00 XIX. Trikitixa txapelketa Plazan.