Hirugarren eguna dute gaur Ergobiko jaiek, eta urtero bezala, sagardoaren eguna ospatuko dute ergobitarrek.
Eguna hasteko, meza nagusia izango da Astigarragako elizan goizeko 10.30etan hasita. Bertan omenduko dituzte auzoko hildakoak, eta meza bukatuta, trikitixak lagunduta egingo dute buelta Ergobira.
Goizeko 11:30etan emango zaio hasiera Sagardo eguneko ekintzarik garrantzitsuenari: sagardo lehiaketari, hain zuzen. Denera 20 sagardogilek hartuko dute parte 55garren edizioan. Bertaratutakoek sagardoa probatzeko aukera izango dute, baita pintxoak jatekoa ere.
Herri kirolak eta dantza, gero
Arratsaldez, aldiz, euskal harri-jasotzaile onenak Ergobiko 104 kg-ko harri baldarra altxatzen saiatuko dira. Jarraian, Iñaki Perurenak agurra egingo dio hainbat aldiz bete duen plazari. Eta hori bukatuta, 19:30etan, hasiko da dantza ‘suelto’ txapelketa.
Dabid Garcia garaile, atzo
Atzo, aldiz, Kros Herrikoia izan zen Ergobiko Jaietako ekintza nagusienetakoa. Aurtengoan, Dabid Garcia durangarra izan zen txapelduna 00:29:43ko denborarekin. Emakumeen kategorian, berriz, Belen Bascoy galiziarra izan zen aurrenekoa (38:27).
GAURKO EGITARAUA
10:30, Meza Nagusia Astigarragako elizan, auzoko hildakoen omenez.
11:30, LV Sagardo Lehiaketa. Denera, 20 bat sagardogile.
17:00, Herri kirolak. Harri-jasotzaile onenen arteko txapelketa.
Jarraian, Iñaki Perurenaren agurra.
19:30, Ergobiko ‘suelto’ dantza txapelketa. 10 bikotek hartuko dute parte.
21:30, Afaria plazako karpan. Eta gau giroa animatzeko, Mariatxiak!