Hildako txakur bat atera zuen Animalien babeserako BOJ elkarteak aurreko asteko asteartean, Hernanin, Ibai-Ondo gurutzatzen duen Urumea errekatik. «Usteltzen ari zen, eta oso gaizki usaintzen zuen», azaldu dio Kronikari Oscar Pa-rrondok, elkartearen izenean.
«Hernaniko udaltzaingoak aurretik jaso zuen abixua»
Parrondok azaldu duenez, «elkarteak Facebook bitartez izan zuen gertatutakoaren berri. Beraz, elkartearen izenean Hernaniko udaltzaingoari deitu genion. Beraiek esan ziguten Donostiako suhiltzaileek jaso behar zutela, baina suhiltzaileei galdetuta, erantzun ziguten beraiek ez dituztela hildakoak jasotzen».
Ez batak ez besteak jasotzeko intentziorik ez zuela ikusita, BOJ Elkarteko bi kide, tartean Parrondo bera, Ibai-Ondora gerturatu ziren: «Oso erraz iritsi ginen txakurrarengana, edozein haur iristeko moduan zegoen. Txip irakurtzailea pasa genion txakur galduren bat zen ala ez jakiteko, baina ez zuen txipik. Hortaz, zakar boltsa batean sartu eta udaltzaingora eraman genuen, beraiek modu higieniko batean bota zezaten».
Etxe-abereak, udal eskumena
Gertatutakoa ikusita, BOJ Elkarteak egoera salatu nahi du: «Araudiak dio etxe-abereen kontuak udal eskumena direla, osasun sailarekin elkarlanean. Horregatik udaltzaingoaren aldetik, gertatutakoa akats larria dela salatu nahi dugu. Are gehiago, partikularren eta elkartearen hainbat abixu jaso ondoren ez zutelako ezer egin».
Ohikotzat jotzen du Oscar Parrondo elkarteko kideak horrelako gaien inguruko sentsibilitate eza, baina dioenez, «dagoeneko osasun kontuetan sartzen ari ginen».