Abuztuaren 27tik aurrera, Kutxabank Erremonte Torneoko finalerdietan egongo da Endika Barrenetxea erremontista hernaniarra. Merezitako txartela lortu zuen herenegun, sorpresa eman eta B taldeko ligaxkako bi partiduak erraz irabazi ondoren.
Txartela boltsikoan, Aizpuru IIIari irabazita
Uterga azpitxalpeldunari irabazita eman zuen aurreneko sorpresa Barrenetxea IVak, eta finalerdietako txartela ia seguru zuen. Dena den, behar beharrezkoa zuen Aizpuru IIIaren aurkako garaipena finalerdietarako pasea ziurtatu ahal izateko. Eta hala izan zen.
Utergaren aurkako garaipenak eman zizkion indar guztiak atera, eta ikaragarrizko partidua egin zuen.
Hasiera hasieratik bere mendean izan zuen pelota; Aizpuru IIIa tartea estutzen saiatu zen, baina bukaerarako ezinezkoa izan zuen egoerari buelta ematea. Ondorioz, 30-14 irabazita etxeratu zen Barrenetxea IVa, finalerdietarako txartelarekin.
A taldeko bigarren sailkatuaren aurka jokatuko du hernaniarrak.
Finalerdian, datorren larunbatetik aurrera
Datorren ostegunean jakingo dira finalerdietan egongo direnen izen guztiak, eta larunbat horretan bertan, abuztuaren 27an, hasiko dira finalerdietako partiduak. Aurrenekoan, A taldeko bigarren sailkatua izango du Barrenetxea hernaniarrak aurkari.