Egun batzuk badira Eusko Legebiltzarrerako hauteskunde kanpaina hasi dela. Euskal Herriko hainbat bazterretan ari zarete EH Bilduren mezua zabaltzen, eta gaur, zu eta Nerea Kortajarena izango zarete Hernanin. Zer transmititu nahi du EH Bilduk gaur Atsegindegin?
Ezkerreko subiranistok herri honentzat proposamen gauzagarri bat dugula eta posible dela herri honetan akordio politiko zabalak erdiestea murrizketa sozialen aurka, gatazkaren erresoluzioaren alorrean eta guztiok hobeto bizitzeko garatu daitezkeen politikak hemen diseinatzeko burujabetza lortzean. Horretarako EH Bildu erabakiorra izango da.
Zer aldatu nahi du EH Bilduk Eusko Legebiltzarrean?
EH Bilduk Legebiltzarrean egongo den erabakitze eskubidearen aldeko gehiengo horrek pausuak ematea nahi du, azken urteetan herri bezala ez baitugu ezer aurreratu eta aldiberean, Europatik eta Espainiatik etorriko diren murrizketei aurre egiteko tinkotasuna adieraziko du. Azkenik, gatazkaren ondorioetan aurrerapausoak emateko ekimen iraunkorrak planteatuko ditu.
Behin eta berriz erabili duzuen lema da: Lehendakari onena, herria da.
Hala da, herritarrek izan behar dute beraien herrien askapen prozesuen gidari. Herriak esan behar du nora jo.
Aurrekanpaina mugitua izan da EH Bildurentzat, Arnaldo Otegiren prozesua medio. B planik ez duzuela diozue... Nola egingo diozue aurre egoera honi?
Arnaldo Otegi da EH Bilduko oinarriak erabaki duen lehendakarigaia. Estatu espainiarrak beste behin bere talante demokratikoa eta botereen banaketa zertan den argi erakutsi digu. Tranpa egingo zutela genioen eta egin dute. Momentua iristean eta hauteskundeak pasa ondoren oinarri sozialak erabaki beharko du nor izango den hautatua.
Argitaratu diren azken inkestetan EH Bildu izango da bigarren indarra. Lehendakaria izan nahi duenak ordea, akordio edo babesen bat beharrezkoa izango du. Zein izango da EH Bilduren jarrera?
EH Bilduk proposamen bat egin die EAJ eta Podemosi akordioak erdiesteko: Herritarron bizitzak hobetu, Euskal Herriaren aitortza lortu erabakiak hemen hartzeko mekanismoekin batera eta bakegintzan aurrera egin, errepresaliatu guztiak etxeratu arte. Ardatz horien inguruan adostasunak lortzeko lan egingo dutenekin hitz egiteko prest. Besterik dira gobernagarritasun kontuak, baina horiek ez gaituzte kezkatzen.
Gipuzkoako zerrendetan bosgarren zaude zu. Gipuzkoako Diputazioan, Martin Garitanoren legealdian diputatu eta bozeramaile lanetan aritu zinen. Lau urteko lanaren ostean berriz ere listetan ez agertzea erabaki zenuen. Indarberrituta al zatoz?
EH Bilduko oinarri sozialak nire izena toki askotan proposatu zuen eta nik errespetu haundia diot militantziari eta barne demokraziari. Hori da nire baietzaren arrazoi nagusia. Bestetik, Ezker Abertzalean egon den Abian erreflexio prozesuak eta orain Sorturen birfundazioak ilusioa berpiztu didate eta EH Bildu bera ere mugimendu bezala indartzen ari da, aniztasun eta ideologia ezberdinak batzen dituen proiektu bat izaki.
Halere, abokatua naiz eta bulegoan jarraituko dut lanean. Legebiltzarra militantzia esparru gisa daukat, ez naiz modu profesionalean arituko eta beraz, nire dedikazioa xumeagoa izango da.
Zer emango dio Larraitz Ugartek EH Bilduri eta Eusko Legebiltzarrari?
Instituzioak barrutik ezagutzearen eta kudeaketaren esperientzia nagusiki, ez baita berdin oposizioan edo Gobernuan jardun izana. Lantalde indartsu bat egingo dugu profesionalki ezaguna den eta freskotasun handia duten pertsonen eta esperientzia dugunon artean. Bestetik, militantea naiz eta feminista. Horrek Legebiltzarreko jardunarekin autokonplazentzia gutxi izatea eragingo dit, seguru, ez konformatzera, borrokatzera baizik.