Jai eguna da etzi, eta hori aprobetxatuz, festak dira bazter askotan. Horien artean, Santiagomendik orduan ospatzen ditu urtero auzoko jaiak, eta aurten ez da gutxiago izango.
Diana, esnatzeko
Goizeko 09:00etan emango zaio hasiera jaiei, bizilagunak esnatu eta jaietan daudela ohartarazten duen dianarekin. Hori bukatuta egiten zuten oilasko bilketa bertan behera geratu da, aurtengoan.
Jai euskaldunetan hain berezkoa den zita 11:30etarako jarri dute. Orduan egingo da tortila lehiaketa eta jana ondo sartzen laguntzeko, sagardo dastaketa tradizionala. Bitartean, gainera, idi proba ikusi ahal izango da.
14:00etan, hasiko da auzo bazkaria Artola sagardotegian, eta bazkalosteko jai giroan jada sartuta, herri kirolen erakusketa ikusteko aukera izango dute bertaratzen direnek, 18:00etan.
Segidan hasiko da toka txapelketa. Eta egunari bukaera emateko, auzo afariak borobilduko du eguna, gaueko 21:00etan hasita, gorputzak irauten duen arte.