Atzo bukatu zitzaion amets olinpikoa Igor Genua errugbilari hernaniarrari. Frantziaren aurka 26-5 galdu, eta ondorioz, Espainiako Zazpiko Errugbiko taldea Joko Olinpikoetatik kanpo geratu zen.
Entsegua, bukaeran
14 puntuko tartearekin irabazi behar zion Espainiako selekzioak Frantziakoari final laurdenetara pasatzeko, eta hori buruan zutela atera ziren zelaira. Ondorioz, baloiaren jabetza osoa izan zuten aurreneko zati osoan zehar, eta defendatzea egokitu zitzaien frantziarrei. Hala ere, 4garren minutuan Frantziak egindako entsegu eta transformazioarekin joan ziren atsedenera (7-0).
Bigarren zatian, frantziarrak indartsu atera ziren, eta hori markagailuan nabaritu zen. Dena den, Genuaren taldeak ez zuen aukera galdu eta azken minutuan egin zuen entsegua (26-5).
Azkeneko postuak, jokoan
Dominak eskuratu ezinik, Kronikako erredakzioa ixtean Keniaren aurka jokatzen ari zen Genuaren taldea, bederatzigarren postua erabakitzeko.