Errekurtso bat jaso ondoren, Goizuetako Udalak bidegorria eraikitzeko egindako proiektua epaitegietaraino iritsi zen. Auzitegi Gorenak zuen azken hitza, eta azkenik Goizuetako Udalaren alde egin du. Ondorioz, Udalak bidegorria egiteko proiektua aurrera eramateko baimena du.
Plan Munizipala, hasiera
2009garren urteko Plan Munizipala onartzean hasi zen dena. Udalak bere webgunean emandako azalpenen arabera, bertan, «ez ziren behar bezala jasotzen bidegorriaren proiektua egiteko zehaztapenak». Orduan, «Udalak aldaketa bat egin zuen Plan Munizipalean proiektu hau aurrera eraman ahal izateko, baina Udalaren egokitzapenak errekurtso bat jaso zuen».
Azken epaia, aldekoa
Auzitegi Gorenak zuen hitza eta dagoeneko kaleratu du azkeneko epaia. Udalaren alde egin du, izan ere, ondorengoa ebatzi du: «Nafarroako Gobernuak onartu zuen Udalaren Plan Urbanistiko Munizipala legeak eskatzen zituen betekizun guztiak onartuta egin zela». Ondorioz, Udalak proiektuarekin aurrera egin ahal izanen du.