Ander Amonarriz hernaniarrak 4garren denboraldia du aurtengoa, Andoaingo Txirrindularitza Eskolan. Hemezortzi urte egitera dijoan honetan, eta Osiñagan bizi denez, «urruti», bizikleta izango du garraiobide! Ederki moldatzen dela erakusten ari da, behinik behin.
Pasa den astean, Iruñerriko Itzulian izan berri da, lau egunez; 352,20 kilometro egin behar izan zituzten parte hartzaileek, 4 egunetan, eta Amonarrizek egunez egun sailkapen orokorrean gora egitea lortu zuen, 17garren postua lortu arte. Egindako lasterketa onak erronka berrietarako indarra emango diolakoan dago: Euskal Herriko Torneoa eta premundiala ditu buruan. Azken Kilometroak dendan bizikleta punttuan jartzen harrapatu dugu.
Laugarren denboraldia duzu Andoaingo Txirrindularitza Eskolan. Nolatan hasi zinen? Zergatik Andoainen?
Hernanin ez zegoen taldea; infantiletara artekoa dago. Andoainen ezagunak nituen, eta hara joan nintzen. Gustatu egiten zitzaidan eta probatzeagatik hasi nintzen.
Hasi eta berehala, Gipuzkoako Selekziorako ere deitu zizuten, eta emaitza ederrak lortu dituzue: Valladolideko erlojupekoan txapeldun, Espainiako Federazioko Trofeoan bigarren... Espero zenuten?
Hau bigarren urtea dut Selekzioarekin. Karreretan ikusten zaituzte, emaitzei begiratzen diete, eta selekzionatzaileak aukeratu egiten zaitu. Taldean errepikatzen ari garenak bagaude, eta giro ona daukagu pelotoian. Ondo moldatzen gara, eta, noski, garaipena bilatutakoa izan da!
Bakarka ere maila ederra erakusten ari zara; Gipuzkoako Itzulian, ekainean, hirugarren zindoazen, eta sailkapen orokorrean 11garren bukatu duzu. Helburua bete duzu?
Espero nuen zerbait izan zen. Gustora geratu nintzen. Denboraldi hasieran ez zitzaizkidan gauzak ondo atera; ez ziren emaitzak iristen. Baina ekainetik aurrera hobera egin dut.
«Portua luzea da, bigarren dijoana sprintean ni baino hobea da, eta uste dut atzean uztea lortuko dudala»
Hain zuzen, Euskal Herriko Torneoko 8garren eta azken etapa izango duzu jokoan igandean, Azkoitian, eta lider zoaz! Aukera baduzu?
Helburua banuen. Ondo egiteko asmoarekin bagindoazen. Igandean, portua luzea izango da, bigarren dijoana sprintean ni baino hobea da, eta uste dut atzean uztea lortuko dudala. Sprintera iristen bagara, aukerak izango ditut oraindik, baina gutxiago...
Helburu berririk badaukazu?
Helburu haundiena da abuztu bukaerako premundiala. Aurrekoak ere karrera inportanteak izan dira eta karrera guztiak irabaztera joaten gara gu! Baina premundialean junior kategoriako Espainiako onenak elkartzen dira, Beasainen.
Arerio ezagunik izango duzu aurrez aurre?
Arerio bat baino gehiago izango dira, nik uste. Fundacion Contador ondo ibiltzen da, adibidez.
Gertuko areriorik badaukazu? Semperena astigartarra, adibidez...
Lasterketetan kontrario da, baina gero, lagunak gara. Hobeto zein moldatzen den... Ez dakit esaten!
Kirol gogorra da txirrindularitza. Profesionaletara iritsi nahi duzu?
Nahi nahi... Orain segi egingo dut, eta hurrengo urtean ere bai. Afizionatuetan urte batzuk egin eta ea nola dijoan gauza. Argi dago gustatuko litzaidakeela profesionaletara iristea!
«Hilabetero, momentuko helburuen arabera, aldatu egiten da; hil honetan 3-4 atseden egun dauzkat. Gainontzean, entrenamenduak edo karrerak»
Lanean gogor segi behar. Nola entrenatzen duzu?
Hilabetero, momentuko helburuen arabera, aldatu egiten da; hil honetan 3-4 atseden egun besterik ez dauzkat. Gainontzean, entrenamenduak eta karrerak! Baina karrera bezperetan hankak askatzeko entrenamenduak egiten ditut, lasaiak, 50 bat kilometro...