Egun seinalatua da uztailaren 31a, hilaren azkena, Santa Barbaran. San Inazio eguna da, eta urtero bezala, gotorlekura igo eta ederki ospatuko dute, egun osoko festarekin.
Goizean hasi eta egun osoan zehar, trikitilarien doinuek alaituko dute giroa Santa Barbaran, Gari eta Iñakiren eskutik. Arratsaldean, gainera, erromeria ere eskainiko dute, 17:30etan hasita.
Jaialdi nagusia, eguerdian
Eguerdi partean egingo dituzte ohiko lore eskaintzak eta meza, eta ondoren, 13:00etatik aurrera, jaialdi nagusia egingo dute. Orduan eskainiko dute Unai Gaztelumendi eta Beñat Mujika bertsolariek, beraien saio nagusia; nahiz eta egun osoan zehar jarriko dituzten bertsoak.
Eta orduan izango dira, baita ere, herri kirolak. Bi laguneko taldetan, Juan Esnal eta Aritz Esnal ariko dira aizkoran, eta Amaia Alkorta eta Ane Arrospide lokotxak biltzen. Gero, herritarrak jarriko dituzte lanean: animatzen direnek, bost plaza egingo dituzte txingekin, eta azkarrenak, diru saria ere jasoko du.
Herri bazkaria, garai batean bezala
Herri bazkarian izango da aldaketa aurten. Garai batean bezala egingo dute, norberak etxetik eramandakoarekin, eta antolatzaileek jarriko dute tokia, eta baita edariak eta kafea eman ere. Gainera, bertsolariek girotuko dute bazkalostea.
Gazteei deia, animatzeko
Antolatzaileek, deialdi berezia egin diete gazteei, animatu eta Santa Barbarara igotzeko. Izan ere, gogoratu dute ez dela helduentzako festa bakarrik.
SAN INAZIO EGUNA
Gaur, Santa Barbaran
10:00, Trikitilariak: Gari eta Iñaki.
11:30, Lore eskaintza.
Ondoren, Bigarren lore eskaintza.
Egun osoan zehar, Bertsolariak: Unai Gaztelumendi eta Beñat Mujika.
12:00, Meza, bertako ermitan.
13:00, Jaialdi nagusia: bertsolarien saio nagusia; herri kirolak (aizkora, lokotxak eta txingak), Juan Esnal, Aritz Esnal, Amaia Alkorta eta Ane Arrospiderekin.
14:00, Herri bazkaria.
16:30, Haur jokoak eta txokolatada.
17:30, Erromeria, Gari eta Iñakirekin.
19:00, Herrira jaitsiera.