Uztailarekin batera iritsi da Astigarraga 2016 aldizkaria ere. 35garren edizioa du aurtengoa, eta urte guzti hauetan jaso dituzte, aldizkarian, «herriko bizitzaren gertakari eta protagonista ugari, eta baita horien balioak zabaldu ere».
«2016koa ere, gure identitatearen lekukotza uzten duten jatorri eta erroen erakusgarri izateko nahi horren isla dugu», azaldu dute.
Dagoeneko eskuratu daiteke, Rosa eta Valella okindegietan, eta Mamen janaridendan.
Herriaren historia, artikuluetako gai nagusia
Herriaren historia izan da, aurtengoan, artikuluetako gai esanguratsuena. Horrela, Urumea, sagardoaren ibaia da artikulu nagusia, Lourdes Odriozola historialariaren eskutik.
Bertsolaritza lantzen du beste batek, Luzia Alberroren doktore tesiaren laburpena denak, hain zuzen ere.
Eta beste hainbat ere jaso dituzte aldizkarian: Mikel Goenaga zenari egindako omenaldia, Juanito Garmendia pregoilariaren jardunari buruzkoa, Xaguxar elkarteak haurrekin egindako beste bat... Eta herrian sortu diren hamaika ekimenenak: 700 kizki-lagun bildu baietz!, Gure Esku Dago, A3 Orain, GuraSOS...