Aranoren etorkizunari kantari, bukatu dira Santioak

Atzo bukatu ziren Santio jaiak Aranon, eta ederki borobildu zituzten festak. Goizean, pelota izan zen protagonista, eta Goizueta eta Aranoren arteko desafioa ez ezik (Goizuetak irabazi zuen, 22-14), Aranoko haurren arteko partidua ere jokatu zen, larunbatean suspenditu zena. Aizkoran ere, garaipenik gabe geratu zen Joseba Izeta aranoarra, Luis Txapartegi lagun, Ander Erasun eta Moises Gogortzaren kontra; 40 bat segundu azkarrago moztu zituzten hamar enborrak, kontrarioek. Baina bertsotan, ez galtzaile eta ez irabazle: Aranoko zein kanpoko, guztiek gozatu zuten saio ederraz, festak borobiltzeko. Gainera, Aranoko haur eta gaztetxoek egindako murala ere erakutsi zuten bertan, eta Aranoren etorkizunari kantari jarri zituzten bertsolariak.