Buruntzaldea Txapelketa ari da azken fasera iristen, eta ostiraletik finalerdiak jokatzen ari dira Hernaniko pelotariak. Gaur hain zuzen, jubenil mailako bi partiduz gozatzeko aukera izango dute Kiroldegiko pelotalekura gerturatzen direnek. 11:00etan hasita, Bikuña eta Arizmendik jokatuko dute, Ugalde eta Etxeberriaren kontra; eta ondoren, Lazkano eta Alberdik neurtuko dituzte indarrak, Aristi eta Zenekortaren kontra.
Finalerdietako azken partidua, nagusi mailakoa, asteazkenean jokatuko da, iluntzeko 20:00etan, Hernanin baita ere. Kasu honetan, Huizi eta Otañok jokatuko dute Urkizu eta Lizeagaren kontra.
Hiru finalista erabakita
Ostiralean jokatu ziren finalerdietako hiru partidu eta jakin ziren final haundira pasa diren aurreneko bikoteen izenak. Kadetetan, Sein eta Azpirozek lortu zuten txartela, Albeniz eta Izetari 22-4 irabazita. Hauek Salaberria eta Arizmendi izango dituzte aurkari finalean, Insausti eta Zugastiren kontra 22-13 nagusitu baitziren. Azkenik, nagusietan, Maiz eta Esnaolak lortu zuten pasea, Etxezarreta eta Gesalagaren kontra 22-11 irabazi ostean.