Ostiral arratsaldean eman zuen berria Gipuzkoako Foru Aldundiak: ez du Chillida-Lekuren erosketan parte hartuko. Kronikara bidalitako prentsa oharrean azaldu dute, urte askoan zehar, euskal erakundeak, Eusko Jaurlaritza buru dutela, harremanetan egon direla Chillida familiarekin: «helburua izan da Chillida-Leku berriz irekitzeko formula bat adostea eta bertan dagoen obra bere osotasunean mantentzea. Elkarrizketak puntu batera iritsi dira, eta premiazkoa izan da behin betiko erabaki bat hartzea».
«Benetan eskertzen dugu Eusko Jaurlaritzak erakutsitako konpromisoa»
Diputazioak oharrean dio, benetan eskertzen duela Eusko Jaurlaritzak gure lurraldearekiko erakutsi duen konpromisoa: «eta baita ere, denbora honetan negoziazioak aurrera eramateko erakutsitako prestutasuna ere».
«Puntu kritikoa erakundeek egin behar duten diru ekarpena izan da»
Diputazioak zehaztu du oharrean zein izan den prozesuaren puntu kritikoa: «erakundeek obra erosteko ordaindu beharko luketen diru ekarpenaren inguruan kokatu da. Kostua 100 milioi eurokoa izango litzateke, eta Aldundiak eta Eusko Jaurlaritzak erdibana hartu beharko lukete bere gain».
«Lehentasuna dira ekonomia eta enplegua sustatzea eta politika sozialak bultzatzea»
Legealdi honetan Diputazioaren lehentasunak zeintzuk diren ere zehazten da oharrean: «2015-2019 legealdian, Gipuzkoako erronka nagusiei aurre egiteko beharrezko kudeaketa tresnak ezarri ditu gure erakundeak. Kudeaketa Plan Estrategikoak lehentasun nagusi bezala finkatzen ditu ekonomia eta enplegua sustatzea eta politika sozialak bultzatzea». Hori horrela, oharrean dio, Diputazioarentzat ezinezkoa dela Chillida-Lekuko obra erosteak exijitzen duen konpromiso ekonomikoari aurre egitea.
«Ez da erabaki erraza izan»
Markel Olano Ahaldun Nagusiak ostiralean gaineratu zuen, ez dela erabaki erraza izan: «erabaki bat hartzeko garaia iritsi da. Aldundiak, Gipuzkoako gizartearekin adostu dituen konpromisoekiko ardura, seriotasuna eta koherentziagatik, erabaki du Chillida-Lekuren erosketan parte ez hartzea. Ez da erabaki erraza izan, inondik inora, baina konbentzituta gaude egokiena dela Lurraldearen interes orokorra defendatze aldera».